Aalisakkat peqqinnartuupput

Aviisimut ilanngutassiaq Aalborg Universitetip napparsimmavissuaneersoq tusagassiuutinut saqqummiunneqartoq, aalisakkat peqqinnassusiannik qularnartoqalersitsisoq, siunnersuisoqatigiinit nalilersorneqarpoq.

- Ilisimatuussutsikkut allaaserisaq taama inerniliisutut isiginngilarput. Allaaserisaq inerniliivoq aseruuttoornermut eqqaanartunit bakteeriaqanngitsunit aaversinnerit marluk kalaaliminertorluni nerinermi allanngorartuusut, Nunatsinni Nerisaqarnermut Timigissarnermullu Siunnersuisoqatigiinnit tusagassiuutinut nalunaarumminni allapput.

Siunnersuisoqatigiit ilanngullugu oqaatigaat, inerniliunneqartunut patsisaasut allaatigisami nassuiaatigineqanngitsut.

Allaatigisami kalaalimerngit nalinginnaasut arfineq marluk inuussutissatigut angisuumik assigiinngitsut naliliiffigineqarput, tassaasut: umimmaat, tuttut, ukallit, aalisakkat, puisit, arferit aamma timmissat, taakkulu nerisassanut avataaniit eqqunneqartartunut arfineq marlunnut sanilliunneqarlutik, ukuusunut: nerisassiat ineriikkat, naatsiiat, naatitat, paarnat nutaat, punneq, manniit aamma immussuaq.

- Taamaalilluni aalisakkat kisimik uuttuiffigineqanngillat aamma aalisakkat allaaserisami ataasiaannarluniluunniit taaneqaratik, Nunatsinni Nerisaqarnermut Timigissarnermullu Siunnersuisoqatigiit taama nassuiaapput nangillutillu:

- Taamaattumik aalisakkat peqqinnassusiannik apeqqusiinissamut ilisimatuussutsikkut apeqqusiinermik allaaserisami uppernarsaateqanngilaq.

Siunnersuisoqatigiit ilanngullugu tikkuarpaat, tusagassiorfinnut nalunaarummi kalaallit ileqquusumik nerisaasa aalisagartalerujussuunerannik oqartoqarnera, ilisimatuutut misissuisut ilaannit oqaatigineqartumik tunngaveqarmat.

- Kalaallit ullutsinni aalisagartortorujussuartut oqaatigineqarnerat, ajoraluartumik eqqunngilaq. Innuttaasut ilaat aalisagartortorujussuupput, kisiannili innuttaasut amerlanerit, sapaatip akunneranut marloriarlutik aalisagartortarnissamik innersuussinermut malinninngillat, tamannalu uggornarpoq, tassami nunarsuarmi aalisakkanik pitsaanerpaanik ajornanngitsumik pissarsisinnaagatta, Nerisaqarnermut Timigissarnermullu Siunnersuisoqatigiit ilaatigut taama allapput.