Aalisakkat naatitallu inuttut peqqissinarluinnarput

Isummakkut nanertisimasalersinnaaneq aalisakkanik naatitanillu nerisaqarluartarnikkut pinaveersimatinneqarsinnaavoq. Spaniami aalisakkanik naatitanillu neriffiulluartartumi misissuinerit kingulliit arlaqartut taamaattoqarsinnaanera takussuserpaat.
oktobarip 15-at 2009 14:58

Universitetini ilinniartut peqqilluartut 10.000-it missaaniittut immersuiffissaq atorlugu qanoq nerisaqartarnersut aperineqarsimapput. Ukiorpaaluillu ingerlaneranni inuit nerisassanik akullersuarmeersunik nerisaqartut tamakkunannga nerisaqanngitsunut sanilliullutik isummakkut nanertisimasalersinnaanermut aarlerinartorsiunnginnerusartut spaniamiut ilisimatusartut oqaatigisinnaalersimagaat, aviisi Dagens medicin allappoq.

Inerniussaq pillugu Københavnip universitetiani inuit nerisaqartarnerat pillugu ilinniartitsisoq Lotte Lauritzen ima oqarpoq:

- Misissuinerit siusinnerusukkut ingerlanneqarsimasut, pingaartumik aalisakkanut isummakkullu nanertisimasarnermut tunngasut, taamaattoqarneranik takussusiisimapput.

Aalisakkat orsuata uummatip taqarsuini nappaatinut iluaqusiisarnerata saniagut isummakkut nanertisimasarnermut illersuutaalluarsimasinnaavoq.

Orsoq aalisakkaneersoq qaratsamit tigoorarneqarnerusarpoq, taamaalilluni timip sianiutaanut tamarmiusunut, pingaartumillu qaratsatta nuannaarnitsinnut aallaavianut sunniuteqartarluni.

- Taamaakkaluartoq tamanna pillugu ilisimasat amigaateqaqaat, inerniliunneqartullu pimoorullugit tigunissaannut nakkutigisamik misissuinerit amerlanerusut ingerlanneqartariaqarput, Lotte Lauritzen oqarpoq.

Taamaakkaluartoq inuit Europap kujataaneersut avannaaneersuullu ilinniarfigisinnaalluarpavut.

Aalisakkat naatitallu peqqinnartuusut nalunngilarput, isummakkullu nanertisimasarneq pinngitsoortinniarlugu taakku nerinerusaraanni akornutaanngilluinnarluni iluaqutaaginnassaaq. Taamatulli nerisaqartarnermi isummakkut nanertisimalinnginnissaq qulakkiivinneqarsinnaanngilaq.