Aalisakkat Mexicop Kangerliumanersuaneersut toqunartortaqanngillat
Aalisakkat nalinginnaasumik nerineqartartut, soorlu peqqussuit, tunfiskit raajallu aalisakkanik misissuisarfimmi naalagaaffimmit pigineqartumi sulisunit misissorneqarsimapput, assigiinngitsunik 400-inik misissuillutik, toqunartortaqalersimanngitsullu paasineqarpoq. Nutaarsiassaqartitsivimmit AP-imit tamanna ilisimatitsissutigineqarpoq.
Misissugassat ilaat avataani pisarineqarsimapput, allalli nunamut qaninnerumi pisarineqarsimallutik. Laboratoriami misissuisarfissuarmit National Oceanic and Atmospheric Administrationimit akuerineqarsimasumi misissuinerit ingerlanneqarsimapput.
Uuliamit akuiagaanngitsumit stofinilluunniit allanit arrortikkuminaatsunit aalisakkat akoqarnersut misissorneqarput.
Uuliamik ullut 81-it matuma siorna maqisoortoqalermalli aningaasarsiutigalugu aalisarneq Amerikami imartaata pingajorarterutaani inerteqqutaalerpoq.
