Aalisakkat issittumiittut sumiiffitsik qimarataannaavaat
Silaannaq allanngoriartuinnassappat aalisakkat issittumiittut issittoq qimassinnaavaat.
Ukiuni 50-ini kingullerni issittup imartaata tarajoqassusia allannguuteqarsimavoq, imerpalanerulersimalluni. Issittup imartaata tarajukinnerulersimanera silaannaap allanngoriartorneratigut siallernerulersimaneranik sermersuillu issittumiittut sukkasuumik aakkiartornerannit pissuteqartoq, USA-mi Massachusettsip imaani uumassusillit pillugit ilisimatusarfimmi ilisimatusartut ukiuni qulikkaani misissuereerlutik taama inerniliipput.
Massachusettsip imaani uumassusilinnik ilisimatuut misissuinerminni paasivaat, nunarsuarmi tamarmi ukiut 1965-ip 1995-illu akornanni siallernerulerneratigut imaq imermik 20.000 kubikkilometerisut annertutigisumik akoqalersimasoq. Tassunga assersuutigineqarpoq, USA-mi koorujussuup Misissippip ukiuni 40-ini kuunnermini, imaq imermik taama annertutigisumik akoqalersittaraa.
Issittup imartaani siku kiisalu sermersuaqarfiit aakkiartorneri immap imermik akoqarnerulerneranut pissutaaqataapput, aalisakkallu issittup imartaaniittut issittup imartaata tarajoqassusianut naleqqussarsimasut imaq imermik akoqarnerulerpat issittup imartaanit qimagussinnaasut ilisimatuut naliliipput.
