Aalisakkat assigiinngitsut amerliartorput
Aalisakkat siornatigut nunatta imartaani siumorneqarsimanngitsut nunatta imartaaniilersimanerannut suna pissutaasoq ilisimaneqanngilaq, immat kissatsinnerunerat imaluunniit ilisimatuut misissuilluarsinnaalersimanerat pissutaanersoq eqqoriarneqarsinnaanngilaq, Pinngortitaleriffik allaaserisaqarpoq.
Aalisakkat siornatigut nunatta imartaani takuneqarsimanngitsut paasineqarput, aalisakkat pillugit ilisimatooq Peter Rask Møller, Zoologisk Museum-imi atorfilik, Pinngortitaleriffik aamma Danmarks Tekniske Universitetimi immami pissutsit pillugit ilisimatusarfik suleqatiigiillutik misissuineranni aalisakkat 57-it nutaat nalunaarsoramikkit.
Aalisakkat nunatta imartaani nutaatut nalunaarsorneqartut 47-it nunarsuatta imartaani allami ilisimaneqarput, allat qulit ilisimatuunit aatsaat takuneqarlutik.
Aalisakkat nutaatut taasat immami itisuumi aalisagaapput. Silap pissussaata allangorneranut attuumassuteqarnersoq qulakkeerlugu oqaatigineqarsinnaanngilaq, Peter Rask Møller oqarpoq.
Aalisakkat nutaat ilai, siornatigut aalisartunit aalisarneqarsimasinnaapput ilisimatuunillu paasineqaratik. Ullumikkummi annertunerujussuarmik aalisartoqartarpoq.
Umiarsuit ilisimatuussutsikkut atorneqartut kilisaatillu immami itisuumi aalisartarput, taamaattumillu aalisakkat siornatigut siumorneqarsimanngitsut pisarinissaannut periarfisssat annertunerulernikuullutik, Peter Rask Møller oqarpoq.
Aalisakkat nunatta imartaani nalunaarsorneqartarnerannut Peter Rask Møller 1992-imiilli suliaqarpoq.
Immat kissatsikkiartornerisa kingunerisaanik aalisakkat danskit imartaani aalisagaasut tallimat, nunatta imartaani siumorneqartarlersimanerat Peter Rask Møllerip uppernarsarsinnaavaa. Aalisakkat nutaat tallimat tassaapput, saarulliit ilaat hvilling, laksesil, blåkæft, havtaske aamma snippe.
