Tunumi aalisakkanut tunitsivituaq Kuummiuniittoq januaarimili matuvoq, tamannalu pissutigalugu Ammassallip kommuneani qaleralinniutit qulit missaanniittut massakkumut uninngapput. Kuummiuni tunitsivimmi sulisuusimasut qulit missaanniittut manna suliffissaqanngillat. Tunitsiviup matunerata kingorna Ammassallip kommuneani inuit 30-nit amerlanerusut suliffissaaleqinermik eqqugaapput. Kuummiuni inunnik isumaginnittoqarfimmi sulisoq Anders Hansen ima oqarpoq:
-2007-ip aallartinnerani tunitsivituarput matunikuuvoq. Taamaalinerani qaleralinniarneq ingerlallualertaraluarpoq. Sermiligaamiit Kuummiuniit Kulusumiit Tasilaamiillu atorluarneqarluartarpoq.
Inuit arlalissuit matoqqanermit eqqugaapput. Tunitsivimmi sulisartut qulit missaanniittut aalisartullu katillutik 30-t 40-llu akornanniittut aamma suliffissarupput.
Aalisakkeriviup qaqugu ammaqqinnissaanik ilisimatinneqaratik Anders Hansen oqarpoq.
- Ammaqqinnissaa suli nalunarpoq. Tunitsivimmik pisisimasut Arctic Prime Fiskeries-ikkormiut oqaraluarput maajip 20-ata missaani Kuummiunut paasissutissiiartussallutik piareersariartussallutillu, kisianni ajoraluartumik ulloq manna tikillugu tusagaqanngilagut.
Anders Hansen oqarpoq aalisakkerivimmi sulisimagaluartut aalisartullu ilarpassui suliffissaarusimasut allatut ajornartumik akiligassatik akilertussagamikkit inunnik isumaginnittoqarfimmut saaffiginnittariaqartartut.
Kuummiuni tunitsivik namminersortup Arctic Primes Fisheries-ip pisiaraa, tunitsivimmillu qaqugu aammaanissaat pillugu Arctic Prime Fisheries-ikkut oqaaseqartinniaraluaratsigit iluatsinngitsoorparput.
Kummiuni aalisakkerivik ammagallarmat qalerallit ukiumut 140 tonsit missaanni suliarineqartartut Ammassallip kommuneanit ilisimatitsissutigineqarpoq.
