Aalisakkanik tunitsiviit ammaqqinneqassapput
Aalisarnermut, Piniarnermut Nunalerinermullu Naalakkersuisoq Finn Karlsen, Siumut sinnerlugu Inatsisartuni ilaasortap, Saxtorph Didriksenip, §37 najoqqutaralugu apeqquteqaataanut taama akissuteqarpoq.
Nunaqarfinni qulini tunitsiviit, Arctic Green Foodip akiliisinnaajunnaarnerata kingorna matuneqarsimasut, Royal Greenlandimit tiguneqarsimapput. Tunitsiviit ilaat aserfallassimaqisut tiguneqarput, tunitsiviilli pingasut, tassa Aappilattumi, Attumi Ikamiunilu tunitsiviit, iluarsartuunneqariarlutik kingusinnerpaamik juunip aallaqqaataani ammarneqassasut, Aalisarnermut Naalakkersuisoq Finn Karlsen akissummi allappoq.
Napasumi tunitsiviup piginnittuata, Lilleholm ApS-ip, Naalakkersuisoqarfimmut nalunaarutigisimavaa, Napasumi tunitsivik kingusinnerpaamik juunip ulluisa 15-ianni ammarneqarumaartoq.
Umiarsuarmik tunitsiviliisoqassappat, tassungaluunniit atatillugu periarfissaqassappat, tamatumunnga qinnuteqaat Naalakkersuisut aamma akueriumaaraat, Aalisarnermut Naalakkersuisoq Finn Karlsen ilaatigut allappoq.
