Aalisakkanik tillinniat
Tuluit Savalimmiut imartaani unioqqutitsillutik aalisartut 222.000 koruuninik akiliisitaapput.
Allattoq Elisa Isaksen
oktobarip 01-at 2007 06:45
Aalisartitseqatigiit, tuluit kilisaataannik ”Enterprice 2”-mik piginnittuusut, Savalimmiut imartaani inatsisinik unioqqutitsillutik aalisarsimanerminnut 222.000 koruuninik akiliinissartik akuerisimavaat.
Kilisaat aalisarfigeqqusaanngitsumi aalisaleruttortoq Savalimmiormiut nakkutilliissutaanit ”Tjaldrid”-imit tigusarineqarpoq.
Kilisaat peqquneqarpoq nakkutilliisut Thorshavniliaqatigissagai, tassanilu Savalimmiormiut eqqartuussiviata kilisaatip naalagaa 100.000 koruuninik akiliisussanngortippaa.
Tamatuma saniatigut pisat aalisarnermilu atortut 122.000 koruuninik nalillit arsaarinnissutigineqarput. Aalisartitseqatigiit ingerlaannaq akiliinissaq akueraat, kinguninngualu kilisaat aalisariarluni aallaqqissinnaasimavoq.
