Aalisakkanik suliffissuaq Nanortalimmi ammarpoq
Aalisakkanik suliffissuup ammaqqinneqarnissaa sioqqullugu kommunemit aalisakkanik suliffissuarmi sulisussanik pikkorissartitsisoqarsimavoq. Sulisussallu amerlanerusut aalisakanik suliffissuarmi atorfissaqartinneqalissappata kommune pikkorissartitseqqinnissaminut piareersimavoq.
-Aalisakkanik suliffissuup matoqqareerluni kingumut ammaqqinneqarnera Nanortalimmiunut Kommunemullumi nuannaarutissaalluarpoq. Suliffeqarfiup aalisakkanik suliffissuup ammaqqinneratigut suliffissanik pilersitsisoqarpoq. Tamannalu aamma Nanortalimmi aalisartunut pitsaavoq, taamaalillutimmi illoqarfigisaminni tunitsivissaqaqqilerput. Suliffeqarfiup aalisakkanik suliffissuarmik ammaaqqinnera nersualaagassaalluarpoq, Kommune Kujallermi suliffissaqartitsiniarnermi ataatsimiititaliami siulitaasoq Kalistat Lund taama oqarpoq.
Kommunemilu borgmesteri amma nuannarutissaqarluarpoq. Aalisakkanimmi suliffiup ammaqqinneqarnerani Nanortalimmi suliffissaaleqineq annikillisinneqarpoq.
- Kommunep iluani suliffissat amerligaangata tamanna kommunemut isumaqartaqaaq. Inunnimmi isumaginninnermi aningaasat ikiorsiissutitut tunniunneqartartut sipaarfigilertarpagut, taamalu akileraarutitigut isertitsinerulersarluta. Tamannali inunnut sulileqqittunut pitsaanerpaasarpoq, tassalu nammineerlutik aningaasarsiulersutik ilaquttaminnut pilersuisinnaanngortarput, Borgmester Simon Simonsen knr.gl-imut taama oqarpoq.
