Aalisagaqassuseq qanorpiaq innersoq nalornissutigaat
Issittumi immap annersaata aasakkut sikoqartarunnaarnera ilutigalugu, aalisakkallu soqutiginartut, aningaasatigut isertitsiffiusinnaasut, avannamut illuariartortillugit, tamaani aalisarneq annertusissagunarpoq. Pisuussutilli pinngortitat inuunerannut tunngassuteqartut pillugit ilisimasavut, Issittumi aalisarneq ilanngullugu, annikitsuinnaapput. Atuagassiami, Polar Biologymi, kisitsisit nutaat saqqummiunneqartut tamanna ersersikkaat, atuagassiami Ingeniørenimi allaaserineqarpoq.
Issittumi sinerissamut qanittumi aalisarneq University of British Colombiami ilisimatuut kisitsisit atorlugit nalunaarsuusianik misissuisimapput. Taakku isumaqarput, kisitsisit pisortatigoortumik takuneqarsinnaasut 75-eriaammik qaffasinnerusut.
Aalisakkat 1950-ikkunnili pisarineqartartut ukiumut agguaqatigiissillugu 24.000 tonsiniit, ukiuni kingullerni 10.000 tonsit missaannaaniilersimasut, ilisimatuut nalilerpaat.
Aalisagartassiisarnermut pisortaqarfimmi pisortaq, Mads Nedergaard, atuagassiamut Ingeniørenimut oqarpoq, aalisakkat sumiiffiit pineqartut eqqaani pisarineqartartut nalunaarsorneqarneri tamaasa pigigitik, Kalaallit Nunaatali avannaani pisarineqartartut qanoq amerlatiginersut nalugitsik, aamma qanoq amerlatiginersut ilisimanngikkitsik.
- Kiatsikkaangat Kalaallit Nunaata imartaani saarulliit piffissami aalajangersimasumi suffinerusarput. Saarulliilli Kalaallit Nunaata sineriaanut anngutissappata sila kitsinnerungaatsiartariaqassaaq, DTU Aquami aamma Pinngortitaleriffimmi sivisuumik ilisimatusarsimasoq, Jesper Boje, atuagassiamut Ingeniørenimut oqarpoq.
Qalerallit avannamut illuariartortunut aamma ilaapput, taamaalillutik Issittup imartaanut itisuumut pinissaat aamma eqqoriarneqarluni.
Issittulli imartaani aalitsattoqarujussualernissaanut silap pissusaa naggataagut kisimi apeqqutaassagunanngilaq, orsussalli akii, Jesper Boje naliliivoq.
