Aalisagaqassuseq assortuussutigaat

Danmark EU-mut piumasaqarpoq aalisakkat putooruttut pillugit killilersuineq unitsinneqassasoq.

Danmarkimi putooruttorniarneq pingasunngormat unitsinneqarpoq, pisassatut killiliussat qaangerneqarmata, matusinerlu Danmarkimit akerlilerneqarpoq.

- Danmarkimi aalisarnermik misissuititagut nalunaarput, ilimagisamiit putooruttut anginerullutillu amerlanerusut, pissutsimmi allanngorsimaqaat, taamaammat putooruttorniarneq ammaqqinneqartariaqarpoq, Danmarkimi Inuussutissaqarnermut ministeri Hans Christian Schmidt oqarpoq.

Akerlianilli pinngortitamik illersuiniaqatigiiffik Verdens Natur Fonden isumaqarpoq, putooruttut Danmarkimi aalisarniinnarneqassappata nungutaassasut.

- Putooruttunik aalisarneq aallarteqqinneqassappat, siunissamik aalisakkat pisaasartut ikilerujussuassapput, tassami putooruttut nungutaasinnaapput, taama oqarpoq, pinngortitamik illersuiniaqatigiiffimmi aalisagaqarneq pillugu ilisimasalik Espen Nordberg.

Saarulliit putooruttullu Danmarkimi aalisarnermi aningaasarsiutaalluarnerpaapput, ukiumullu milliardinik arlalinnik aningaasarsiutaasarlutik, taama aviisi politikken allappoq.