Ilisimatuut Galathea 3-mi ilisimasassarsiorlutik angalasut Sikuiuitsumi Kujallermi aalisakkamik ilisimaneqanngitsumik nassaarput.
Peter Rask Møller, Statens Naturhistoriske Museum-imeersoq, aalisakkamik ilisimaneqanngitsumik nassaartuuvoq. Taanna nimeriaasaavoq 20-25 centimeterinik takissusilik. Aalisakkamik nassaartup aalisakkap atsernissaa pisinnaatitaaffigilertarpaa. Aalisagarlu ilisimasassarsiortut umiarsuaat atsiullugu qularnanngitsumik atserneqassagunarpoq:
- “Vædderen”-imut tunngasumik qularnangitsumik atsissavarput, tassami aalisakkat arlallit siornatigut Galatheami ilisimasassarsiornerit atsiullugit atserneqartareermata, Peter Rask Møller oqarpoq.
Taassuma qularutiginngilaa nassaani aalisagaasoq siornatigut nassaarineqarsimanngitsoq, tassami Galatheami angalanissartik sioqqullugu aalisakkat nimerissanut tunngasut misissoqqissaarsimagamigit; taamaalillunilu ilisimallugu timitamik qeqqatigut tattaqarneq ajortut. Nassaavami taamaattuuvoq.
Aamma ilisimatuut oqarput aalisagaq nutaaq isikkorippallaanngitsoq, tassamigooq qimmip anaanut isilimmut eqqaanarnerugami.