Aalisagaq eqqumiitsoq tipisimasoq
Aasianni aalisakkamik eqqumiitsumik sissamut tipisimasumik
nassaartoqarsimavoq. Tassa aappariit Sonja aamma Henrik Brandt sapaatip akunnerani kingullermi sissamiillutillutik aalisagaq eqqumiitsoq aningangaatsiartorlu, tassa 90 centimeterisut takitigisoq ammalukullattorsuarlu sissamut tipeqqasoq nassaarisimavaat, assilisaqattaariarlugulu assit Pinngortitaleriffimmut nassiussimallugit.
Pinngortitaleriffimmit oqaatigineqarpoq aalisagaq taanna nunatta imartaani qaqutigoortupilussuusoq, siornagut ataasiaannarluni naammartoorneqarsimalluni. Aalisagaq pineqartoq qallunaatut ateqarpoq Glansfisk Latinerisullu Lampris Guttatus.
Oqaatigineqarpoq aalisagaq naliginnaasumik nunarsuatta ilangaatsiaani nassaassaasoq, avannamut Island tikillugu kujammullu Afrika kiisalu Australiap kujasissortaa tikillugit pisarineqarsinnaalluni, unnialu aappillarissumik orsuarnitsumillu nerpigissoq nerineqarsinnaalluartumik.
Aalisagaq Glansfiski nunatsinni siullerpaamik takuneqarsimavoq Arsuup eqqannguani 1867-imi.
