Aalisagaq eqqumiitsoq

Qeqertarsuatsiaani aalisartoq eqalunniartilluni snippe-mik napittormat tamanna uumassusilerineq eqqarsaatigalugu tupaallannanngitsuunngilaq.

Snippe Nunatsinni siusinnerusukkut naammattoorneqarsimanngilaq taamaattumillu Pinngortitaleriffimmi uumasulerituut uumasumik taassuminnga takutinneqaramik uissuummerujussuarsimassagunarput.

Snippe aalisakkat meqqutaasartallit ilaatigut søhestit ilagaat. Aalisakkat taakku nalinginnaasumik Europap kitaata sineriaani Norgep avannaanit Portugalimut Sarfarsuarmi kissartumiiittuupput aammali Savalimmiuni Shetlandillu qeqertaaniittarlutik. Immap maanna Nunatta kitaani kissarnerunera snippe-p tamaani uumasinnaaneranut pissutaaqataasimagunarluinnarpoq, taama oqarpoq Pinngortitaleriffimmi biologi Kaj Sünksen.

- Snippe taanna 40-60 cm-erisut angitigilersinnaavoq qeqquaqarfinnilu 100 meterisut ititigisuni sineriammut qanittumi uumasuulluni, timaa nimerissatut iluseqarmat imaani naasoqarluartumi aalassarilluni ingerlalluarsinnaavoq. Timaata ilusaa aamma papeqquminik qeqqussanut aalajangeqqasinnaaneranut pissutaaqataavoq, taamaattorli napalluni inissisimasarpoq aalarujoorlunilu pisarisinnaasaminik saneqquttoqarnissaata tungaanut qeqqussatut isikkoqarluni. Snippe aalisagaaqqanik peqqukkunnillu mikisunik uumassuteqarpoq.