Aalborgip umiarsualiviata isertitani marloriaatinngortippai
Umiarsualiviup naatsorsuutai 2010-p naanerani 9,8 millionit koruuninik sinneqartoorfiupput, tamatumunngalu peqatigitillugu umiarsualiviup ingerlatamini kaaviiartitai 10 procentimik qaffariarput.
Allattoq Elisa Isaksen
maajip 10-at 2011 08:05
Containerinik assartuinerup Göteborgimut aamma Rotterdamimut aallartinneqarnera, naatsorsuutit pitsanngoriaateqarnerannut ilaatigut pissutaasoq, aviisimi Nordjyske Stiftstidendemi ullumi allaaserineqarpoq.
Umiarsualivik 2022-p tungaanut Nunatsinnut assartuinermi qitiusussaavoq. Tamanna paasinarsivoq, Namminersorlutik Oqartussat Aalborgip umiarsualivianut isumaqatigiissutertik siorna sivitsormassulli.
Royal Arctic Logisticip illutassai nutaat maanna sananeqaleruttorput, ukiortaamullu piareersimasussaallutik. Kalaallit umiarsuaatileqatigiiffiat illunut nutaanut nutserpat, Aalborgimi umiarsualiviup umiarsuaatilinnik allanik sullissinissaminut inissaqalissasoq, umiarsualiviup pisortaa Claus Holstein oqarpoq.
