Aalborgip Kangerlussuullu akornanni timmisartuussisalissagunarput
Takornarniaqarnerup annertusarneqarnissaa eqqarsaatigalugu, taavalu angalaniartut amerliartuinnarnerat pissutigalugu, ilimanarpoq Aalborgip Kangerlussuullu akornanni sapaatip akunneranut marloriarluni timmisartuussisarnissaq iluatsissinnaassasoq.
Inuussutissarsiutit pillugit sapaatip-akunnerani kingullermi ataatsimiittoqarnerani tamanna eqqartorneqarpoq, suleqatigiissitaliortoqarmat Air Greenlandimiit taavalu Aalborgimi Timmisartoqarfimmi pisortaq isumaqatigiipput periarfissanik misissuiniarlutik.
- Mianersuutigissavarput eqqortissinnaanngisatsinnik neriulluartitsivallaassannginnatta.
Suleqatigiissitaliornerulli takutippaa neriuutissaqartugut, Aalborgimi Timmisartoqarfimmi pisortaq, Søren Svendsen, oqarpoq.
Apeqqutaavorli kikkut timmisartuussisassanersut.
- Air Greenlandiusinnaavoq, taavalu Aalborgimiit angallassisartut peqataasinnaallutik, Søren Svendsen erseqqissaavoq.
Aalborgimi Timmisartoqarfimmi pisortap oqarnera naapertorlugu ukioq naallugu sapaatip akunneranut marloriarluni timmisartuussisarnissaq suleqatigiissitat siunniuppaat.
