Aalborgip aamma Nuup ikinngutigiinnertik nukittorsarpaat
Aalborg aamma Nuuk illoqarfittut ukiorpassuarni ikinngutigiipput, uanilu qaammammi aaqqissuussinissaq Aalborgimi Kalaallit 2008-mi ulloqartitsisimaneranut qujassutaavoq.
Nuummi Aalborgimut ulloqartitsinermi inuit 50-it missaat tikeraassapput, politikerit, eqqumiitsuliortut, nipilersortartut, timersortartut aamma niuertut, siuttuussaarlu Aalborgimi borgmesteri, Henning G. Jensen.
Aalborgimi borgmesteri aamma Kommuneqarfik Sermersuumi borgmesteri, Asii Chemnitz Narup, politikerinik isumasiortitsissapput, tassani politikerit qallunaat kalaallillu qulequttat susassaqaqatigiiffitik, soorlu atuarfeqarneq aamma ilinniartitaaneq kiisalu assartuineq angallannerlu, eqqartorneqassallutik.
Tamakku saniatigut illoqarfimmiut kulturikkut timersornikkullu sammisaqartinneqassapput. Soorlu isiginnaartitsisartoqatigiit Dunkelfolket, kiinarpalerlutik isiginnaartitsisartut tikeraassapput.
Aalborgimi sunngiffimmi susassaqartitsivimmeersut inuusuttut nunani tamalaaneersut pikkorilluinnartut aamma aggissapput, taakku Nuummi inuusuttut suleqatigalugit musicalimik tusarnaartitsissapput, nipilersussallutik, erinarsussapput rapperlutillu.
Meeqqat inuusuttullu Nuummeersut aamma illoqarfimmi bussit atuariartortunik angallassisartut kusassarumaarpaat, inuutissarsiutigalugu eqqumiitsuliortut marluk, Betina Jung Aalborgimeersoq aamma Peter "Kujooq" Kristensen Nuummeersoq suleqatigalugit.
Nuummi Aalborgimut ulloqartitsineq 2011 piviusunngortinneqarpoq, Aalborg Kommunep, Aalborg Havn A/S-ip, Namminersorlutik Oqartussat aamma Kommuneqarfik Sermersuup suleqatigiinnerisigut.
