Aalborgimut aqqut uatsilaaq
Atuagassiami allaaserineqarpoq, Greenland Expressip Atlantiku ikaarlugu timmisartuussisalernissaa Naalakkersuisut sapaatip-akunnerani kingullermi oqaluuserisussaagaluaraat. Aalajangernissarli qinersisoqareernissaata tungaanut tassa kinguartinneqarallarpoq.
Timmisartuutileqatigiiffillu nutaamik aallartitsiniartup, Gert Braskip, tamanna pakatsissutigaa.
Kinguartitsinermut pissutaasoraa, Air Greenlandip kisermaassinissaa Naalakkersuisut ammaakkusunngikaat. Oqarporlu Namminersorlutik Oqartussat Air Greenlandip aningaasatigut inissisimaneranut soqutiginnikkamik taamaaliortut.
Greenland Express Kalaallit Nunaata Danmarkillu akornanni angalasar niarpoq, aqqutinilli allanik aamma eqqarsaateqarluni, atuagassiami Stand By-imi allapput.
Timmisartuutileqatigiiffik oqartussaasunit akuerineqassaguni Aalborgimit, Københavnimit, Keflavikimit, Amsterdamimit, Canadamit, Londonimit Tysklandimillu timmisartuussisarniarpoq.
Greenland Express Kangerlussuarmit Aalborgimut sapaatip-akunneranut pingasoriarluni timmisartuussisarniarpoq, Københavnimullu spaatip-akunneranut marloriarluni.
Suliniut Gert Braskip siorna aallartippaa, Tuluit Nunaannit, Hollandimit Dubai-imillu aningaasaliisussanik pissarsilluni. Greenland Express hollandimiut timmisarrtuutileqatigiiffiannik aallaqqaammut suleqateqassaaq, timmisartoq Airbus 319, Airbus 320, taakkuluunniit assigisaannik, Hollandimit pissarsissagami.
