Aalborgimi umiarsualiviup assartuinermi angallassiviit pitsanngorsarpai
Umiarsuaatileqatigiit X-Press Container Line-p Aalborgi, Gøteborgimi, Gijonimi, Bilbaoimi, Le Havremi Rotterdamimilu umiarsualivinnut attavilerpaa. Pingaartumillu Rotterdamimi umiarsualivik Europami containerinik angallassinermut umiarsualivittut qitiuvoq.
- Tassa imaappoq, Kalaallit Nunaata Aalborgillu akornanni aqqut annertusineqassasoq Europamut, USA-mut Kangianullu Ungallermut angallassinermik ilaqalersillugu. Usit containerini ilivitsuniittut tunisassiortuneersut maanna toqqaannartumik Aalborgimiit nassiunneqarsinnaalerput ullumikkutut nunaannaap aqqusernatigoorteqqaarnagit.
Taavalu suliassaqarnerulissaagut, Royal Arcticimi usinik piareersaasarnermut pisortaaneq Jesper Balthazar-Christensen oqarpoq. Pingaartumik Kalaallit Nunaanni nerisassanik tunisassiortut pingaartumik periarfissanik nutaanik iluaquteqalissasut taassuma ilimagaa.
Angallavimmi aningaasat CO2-lu ileqqaarneqartassapput, assartuineq Aalborgimiit Århusimullu nunakkut aqqummut taarsiullugu imaatigut pisalissappat. Tamanna Aalborgip Kalaallit Nunaannut pingaarnertut umiarsualivinngornerata kingorna pingaartumik kalaallinit kissaatigineqarsimavoq, Ole Brøndum, Aalborgip umiarsualiviani tuniniaanermut aningaasarsiornermullu pisortaq aviisimut Nordjyske Stiftstidendemut oqarpoq.
Aalborgimi umiarsualiviup naatsorsuutigaa containerit ukiumut immikkut 5-10.000-it angallanneqartassasut neriuutigaalu siunissaq ungasinnerusoq eqqarsaatigalugu taakkua ukiumut 60.000-iniit 120.000-inut amerlisinneqarumaartut. Ole Brøndumip aamma nunanut Østersø-p sineriaaniittunut angallavissat misilinneqarnissaat eqqarsaatigaa.
Umiarsuit marluk angallavimmi nutaami angalasassapput. Aalborgimut tikiffissaat siulleq aggustip 18-ianni pissaaq tamatumalu kingorna pingasunngornerit tamaasa pisassalluni.
