Aalborgimi umiarsualivik pillugu isumaqatigiissumminik nutarterivoq
Aalborgip umiarsualiviata aamma Royal Arctic Linep akornanni isumaqatigiissut Naalakkersuisut akuersissutigaat.
Isumaqatigiissut aningaasaliinerpassuarnik nassataqassaaq. Aalborgip umiarsualivia umiarsualivimmi 250 mio. kronenik aningaasaliissuteqanissaminut pisussaatippoq quersuup nutaap 5.200 kvadratmeteriusup, quersuarmi akunnittarfiup 4000 kvadratmeteriusup allaffiillu sananeqarnerisigut. Isumaqatigiissut nutaaq naapertorlugu umiarsualivimmi nillataartitsiviit qerititsiviilu ukioq 2011 tikitsinnagu piginaasaat 50 procentimik annertusineqassapput, 2012-imiilli atorunnaarsinneqarsinnaassallutik.
- Inissat ukiuni kingullerni anersaaruluutigisimavavut. Tamanna ineriartorneq ilutigalugu pisariaqalersimavoq. Tunngaviusumik isumaqatigiissutip sivitsorneratigut taakkua pissarsiarisinnaavavut, tusagassiorfinnut nalunaarut malillugu Jesper Balthazar-Christensen, Arctic Container Operationimi pisortaq oqarpoq.
Aammattaaq Aalborgip borgmesteria qilanaarpoq:
- Kalaallit Nunaata Danmarkimi kisarsimaffeqarnissaanut nukiit pitsaasut tamaasa katersorpavut, taama oqarpoq tikkuarlugulu, isumaqatigiissutip Aalborgip umiarsualivia Kalaallit Nunaata avataanut angallannermut allamut pilerinartunngortikkaa.
Sulisut 1000-it sinneqartut Aalborgimi umiarsuarliviani Kalaallit Nunaannut toqqaannartumik atassuteqartut sulisuupput.
Isumaqatigiissutip nutaap atsiorneranut peqatigitillugu Royal Arctic Linep ingerlatseqatigiiffii aqutat Arctic Container Operation aamma Royal Arctic Lineagentur ataatsimut kattupput. Kattunnissaq piffissami sivisuumi pilersaarusiorneqarpoq, aallaavittulli umiarsualivik pillugu isumaqatigiissutip sivitsorneqarnissaa utaqqimaarneqarsimalluni.
