Aalborgimi suliffissaaleqisut Kalaallit Nunaannut nassiunneqartut

Sammisaqartitsinerit akiligassartaasa annersaat Aalborgimit akilerneqassapput - aamma naak sullivik Kalaallit Nunaanniikkaluartoq.

Ilinniarsimasunik Nuummi sulisussaaleqineqarpoq. Ajornartorsiut annertuvoq ingammik maannakkut,  Kommuneqarfik Sermersuumi suliffissarsiuussivimmi pisortaq Grethe Nielsen oqarpoq.

- Amigaateqarfeqarpugut. Ingammik sanaartorfinni sulisussaaleqineqarpoq. Tamatuma kinguneraa sanaartorfinnut annertuunut sulisussanik avataaneersunik amerlasoorpassuartigut tikisitsisariaqartarluta.

Ingammik inuit struktøritut ilinniarsimasut sanaartortitsisut ullutsinni amigaatigaat. Taanna Kalaallit Nunaanni ilinniarneqarsinnaanngilaq, kisianni Aalborgimi ilinniarneqarsinnaavoq. Tappavanilu kalaallinit kingoqqisunik ilinniartitsiniarsaripput.

Kommunit taakku marluk pikkorissaaneq sapaatit akunnerinik arfineq pingasunik sivisutigisoq aallartissimavaat Nuummi sulilernissaat siunertaralugu.

- Forskallingilerinermut, qajannaallisaanernut betonilerinermullu pikkorissaanerup pisinnaalersissavai, sanaartorfinni sulisinnaatilerlugit.

Pikkorissartut Aalborgimi najugaqarmata Aalborg Komunip akiliutissavai, Kommuneqarfik Sermersuullu Nunatsinnukarnerat akilissallugu.

Inuit eqqartukkavut Kalaallit Nunaanniit Danmarkimut nuuttuugaluartut pilersaarutip piviusunngortinnissaa sulissutigisariaqartoq, suliffissarsiuussivimmi pisortaq Grethe Nielsen oqarpoq.

- Pilersaarutaavoq ilinniarnermut atatillugu suliffimmiinnerit Nuummi ingerlanneqartarnissaat neqeroorutaassasoq, nunaqqativut maanna jyllandimiittut misilillugu takuniassammassuk piffissami aalajangersimasumi maani sulerusunnerlutik imaluunniit Kalaallit Nunaannut angerlarusunnerlutik.

Sapaatit akunneri arfineq pingasut pikkorissareerlutik danskit assigusumik pikkorissartinneqareerlutik 90 procentii suliffittaartarput.
Eqqarsaataavoq Aalborg Kommunip Kommuneqarfik Sermersuullu suleqatigiinnerata faginut allanut aamma siammarneqarnissaa.