Aalborgimi kalaallit angerlarsimaffeqanngitsut ukiukilligaluttuinnarput

Danmarkimi kalaallit angerlarsimaffeqanngistut 350-it missaannittut, isumaginninnikkut ilisimatusarfiup SFI-ip uppersarpaa.

Kalaallit angerlarsimaffeqanngitsut amerlassusaat siullermeerlugit kisitsinngorlugit saqqummiunneqarput. Manna tikillugu qanoq amerlatiginerat ilisimaneqarsimanani.

Isumaginninnikkut ilisimatusarfiup misissuitsinerani kalaallit Danmarkimi angerlarsimaffeqanngitsut Aalborgimi amerlanersaapput.

Tassalu Aalborgimi angerlarsimaffeqanngitsut 26 procentii kalaaliupput. 

Tamannalu angerlarsimaffeqanngitsut inuttullu ajornartorsiuteqartut najugaqarfigisartagaanni Svenstrupgaardimi Aalborgimiittumi takuneqarsinnaavoq.

Svenstrupgaardimut  takkuttartut inuusunneruleriartorput, Benny Sørensenip Svenstrupgaardimi imikkoortortami pisortap oqaatigaa.

Kalaallit 18-it 30-t qeqqata missaannik ukiullit Svenstrupgaardimut takkuttartut amerlanerupput, Benny Sørensen oqarpoq.

Najugaqarfiugallartartumi Svendstrupgaardimi, angerlarsimaffeqanngitsut ornittagaannut sanilliullugu ajunnginnerusunik periarfissaqartitsivoq, tassalu qaammatit pingasut tallimallu akornanni Svenstrupgaard najugaqartitsisinnaagamik. Benny Sørensenillu nalunaarutigaa, kalaallit Svenstrupgaardimiittartut qaammatit tallimat tikillugit najugaqarfimmiittartut.

Najugarfiugallartartumi Svenstrupgaardimi inissaaleqisut atornerluisut inuttullu ajornartorsiuteqartut ikiorneqartarput.

Inuusuttut Svenstrupgaardimut takkutartut, Kalaallit Nunaanni angerlarsimaffeqannginneq suliffissaaleqinerlu pissutigalugit Danmarkimut nuuttarlutik oqaatigisarpaat.

Svenstrupgaardimi kalaallit arfineq pingasut maanna inissisimapput.

Svenstrupgaardimi kalaallimik ataatsimik aalajangersimasumik atorfeqartoqarpoq.

- Kalaallilt Nunaanni periarfiusinnaasunik neriuutaarunneq pissutigalugu inuusuttut Danmarkimut nuuttarlutik oqaatigisarpaat, Benny Sørensen oqarpoq.

- Ilinniagassanik najugaqarfissanik suliffissanillu amigaateqarnertik pissutigalugu nuuttarput, Svenstrupgaardimi immikkoortortammi pisortaq oqarpoq.

Kalaallit Danmarkimut nuuttartut ilisarisimasaqarnertik imaluunniit ilaqutaqarnertik pissutigalugu nuuttarput, taakkunanilu najugaqartarlutik. Inissisimaffigisaminni  pissutsit ajorsigaangata angerlarsimaffeeruttarput. 

Najugaqarfiugallartartumi Svenstrupgaardimi kalaallit agguaqatigiissillugu ukiumut tallimat aqqaneq marlullu akornanniittut najugaqartarput. Svenstrupgaardimi 45-nik inissaqarpoq.

Immikkoortortaqarfimmi pisortap ernummatigaa, kalaallit angerlarsimaffeqanngitsut amerliartuinnassasut taamaattumillu tamanna pinaveersaartinniarlugu Kalaallit Nunaanni paasisitsiniaasoqassoq Benny Sørensen isumaqarpoq, tassalu Danmarkimut nuunneq aamma ajortunik kinguneqarsinnaammat.