Aalborgimi ilinniartut qallunaatut pikkorissarsinnaapput
Ilinniartut suliaminnut pikkorikkaluarlutik oqaatsit aporfigisarmatigit taamaaliortoqarpoq. Ilinniartut siunnersortaat Signe Vinter Bach taama oqaluttuarpoq.
- Ingerlariaqqiffiusumik ilinniartut ilaasa oqaatsit peqqutigalugit ilinniarnertik ajornartorsiuteqarfigisaraat maluginiarsimavarput, kalaallisut siullertut oqaaseqarnertik peqqutigalugu qallunaatut nalorninartorsiutigisarpaat, oqaatsitigullu nalorninartorsiuleraagamik ilinniarnermut naleqqutinngitsutut misigisarput, soorlu misilitsissimallutik angusinngitsoortarput misilitsinneq allattariarsornikkut ingerlanneqarmat, misilitsinnerlu akunnerni sisamani tallimaniluunniit ingerlanneqarsimasoq censorip suliamik naliliiniarluni allakkiamik paasinnissinnaannginnera peqqutigalugu, naak ilinniartup apeqqutit paasisimagaluarlugit akisinnaagaluarlugillu.
Pikkorissarnerni taakkunani ilinniartut sorpiaat ilinniartarpaat?
- Oqaloqatigiinnerni paasinarnerusumik tunngavilersuisinnaanerat tassani pineqarpoq, tassami Kalaallit Nunaanni ilinniarfinnit Danmarkimi allaanerusumik ingerlanneqartaramik oqaloqatigiinnerusarlutik. Oqaluttariarsorluni saqqummiinerit oqalugiarnerit ilinniartarpaat, tamannalu oqaluttariarsorluni misilitsinnermut atatillugu atorluarsinnaavaat, aamma universitetini oqaatsit atorneqartartut ilinniartarpaat.
Ilinniartut pissarsiaqarfigisarpaat?
- Aap, ilinniartut tamanna ilikkagaqarfigisimagaat qanittumi nalilersuilluta malugaarput, tamannalu ingerlateqqikkusuppaat, aamma allattariarsornikkut oqaluttariarsornikkullu saqqummiiniarnerni ilinniartut imminnut tatiginerulersimasut malunnarpoq.
Pikkorissaaneq Namminersornerullutik Oqartussat aningaasaateqarfiannit "Ilinniartut uniinnartartut ikilisinniarlugit suliniutinit" aningaasalersorneqarpoq.
Pikkorissaaneq februarimi aallartippoq, maannalu pikkorissartut arfineq-marluupput. Aasaanerani atuanngiffeqareernerup kingorna pikkorissarnissamullu periarfissaqartoq amerlanernit ilisimaneqalerpat pikkorissartut amerlinissaat Signe Vinter Bachip naatsorsuutigaa.
