Aalborg umiarsualiveqarfiuinnassanersoq suli nalunarpoq

Ålborgemi umiarsualivik nunatsinnut nioqqutissanik nassiussanillu nassiussisarfiup Grønlandshavnip siunissaa suli nalunartoqaqaaq.

Siunnersuissarfiup Carl Brop nassiussisarfik pillugu nalunaarusiani Royal Arctic Linemut novembarip naanerani tunniuppaa, misissuinerminilu nalilerpaa Ålborgemi Grønlandshavni nunatsinnut nassiussuinera akikinnerusoq.

Nalunaarusiaq pillugu Royal Arctic Line taamani ullumilu oqaaseqarusunngilaq.

Royal Arctic Linep pisortaa naalakkersuisunut innersuussivoq, nalunaarusiaq naalakkersuisut isummerfigisussaammassuk.

Ålborgep siunnissaa pillugu Naalakkersuisut sisamanngormat killiffimmik tusarlerneqarput, nalunaarusialli imarisaanut attuumassutillit misissoqqinneqartussaammata attaveqarnermut naalakkersuisoq Jens Napaattooq annerusumik suli oqaaseqarusunngikkallarpoq.

Ålborgemi Grønlandshavne ukiumut nassiussanik kilomiit tonimut oqimaassusilinnik 85 000-nik nassiussisarpoq.

Jyllandillu avannaani suliffeqarfiit nunatsinnut sutigulluunniit pilersuinerpaapput, kisitsisingorlugu 75 procentit.

Ålborgep umiarsualivia siunissami nunatsinnut pilersuisuussanersoq februaari aallartilaarpat aatsaat paasinarsinerussasoq, attaveqarnermut naalakkersuisoq radioaviisimut oqarpoq. Royal Arctic Linemi innersuussutissani tunniuttussaagamigit.