Aalborg Havn Nuummi aningaasaliiniarpoq
Nuup umiarsualiviata ingerlannera annertusarneralu siunissami ingerlatseqatigiiffimmit ingerlanneqalissaaq. Suleriusissaq suli inissinngilaq. Taamaakkaluartoq ingerlatseqatigiiffiliorniat avataaniit aningaasaliisussarsereerput.
Aalborg Havn A/S maanna nalunaarpoq 20 millioner koruuninik aningaasaliiniarluni taamaasilluni qulakkeerniarlugu Jyllandip avannaani suliffissaqartitsisinnaaneq.
- Nassiussat poortorneqarlutillu Aalborgimi tiguneqartarput. Kalaallit Nunaanniillu uteriaraangamik aalisakkanik imaqartarput taakkulu avammut tunisassianngorlugit maani poortoqqinneqartarput. Nassiussat amerlippata taava suliffissat amerlanerulerumarumaarput, Aalborg Havn A/S-mi pisortaq Claus Holstein DR P4 Nordjyllandimut taama oqarpoq.
Taanna aamma isumaqarpoq nunatsinni uuliasiorneq iluatsilluassappat Jyllandip avannaani suliffissat tusintilikkaat pilersinneqarsinnaasut.
Assartuineq pillugu isumalioqatigiissitaq inassuteqarpoq Nuummi umiarsualivik allilerneqassasoq tassanilu siunnersuutigaat containerersornermi umiarsualivik 320 meterisut angitigisoq sananeqassasoq.
- Nutaamik umiarsualiviliorneq inuiaqatigiit annertuumik iluannaarutigisinnaavaat, Assartuineq pillugu isumalioqatigiit isumaliutissiissumminni allapput.
Kommuneqarfik Sermersooq, Namminersorlutik Oqartussat aamma Royal Arctic Line piffissami sivitsulersumi suliniut pillugu piareersaateqarput maannalu tassa Aalborg Havn A/S peqataalerpoq.
Royal Arctic Line-mi pisortaq Jens Andersen KNR-imut ilisimtitsivoq suli piareersarnerup nalaaniillutik. Neriuutigineqarporli ingerlatseqatigiiffik Nuuk Container A/S ukiortaaq sioqqullugu pilersinneqarsinnaajumaartoq.
