Aalborg Aarhus Esbjergilu umiarsualiorusullutik pilerngupput

Aningaasat kaaviiaartitassat suliffissallu amerlasuut pillugit Danmarkimi illoqarfiit pingasut umiarsualivimmik nunatsinnut nassiussiffiusartumik pilersitsinissaminnut pilerngutileruttorput.

Aalborg, Århus Esbjergiluunniit. Danmarkimi illoqarfiit taakku arlaat nunatsinnut nassiussuiffiusartumik siunissami umiarsualiviulissaaq. Illoqarfinni pineqartuni naalakkersuinermik suliaqartut eqeersimaarlutik pilerngutileruttorput.

Esbjergimi borgmesteri umiarsualivimmilu pisortaq siuttoralugit ippassaq Nuummut tikeraartoqarpoq.

Esbjergip borgmesteria Johnny Søtrup ima oqarpoq.

- Aalajangiisussat qanimut naapinnissaat pingaartissimavara. Naalakkersuisuni ilaasortat arlallit tikillugit oqaloqatigaakka. Allaganngorlugu nassiussiinnarnermiit suleqatigiumasat naapillugit iluarneroqaaq, Johnny Søtrup oqarpoq.

Illoqarfinnit marlunnit siuttut taamatorluinnaq aamma eqqarsarput. Aalborgip borgmesteria apriilip qiteqqunnerani nunatsinniippoq. Århusimilu borgmesterip siusinnerusukkut tikeraarnissaagalua naalagaaffeqatigiit ataatsimeeqagiittussaanerat pissutigalugu kinguartinneqarsimavoq, naalakkersuisunilli aggersarneqarnissi utaqqiinnarpaa.

Illoqarfiit taakku aalajangiisussanut ilisaritiinnartussaanngillat pitsaasunilli neqerooruteqarnissaat aamma pingaaruteqarpoq:

- Hans Enoksenimut aasap ingerlanerani pitsaasumik neqerooruteqarnissarput ippassaq ilimageqquara, Esbergip borgmesteria Johnny Søtrup oqarpoq.

Suliarinnittussarsiornermi suliakkiissutit umiarsualivinnut pingasunut ataasinngorpat nassiunneqassapput. Septembarimi umiarsualiviup illoqarfimmi sorlermiinnissaa aalajangerneqassaaq.