DBU-p – Danmarkimi isikkamik arsaannermut kattuffissuup – Danmarki nunanut allanut unammigaangat isiginnaartut aalakoorpallaartut Parkenimi isiginnaartut inaanniit peersittalerusuppaat. Tassa isiginnaartut aalakoorpallaartut toqqissisimanartinneqanngimmata.
DBU-p aamma Parkenip ullumikkut paasiniartussaavaat taama pisoqarneranut kikkut akisussaasuunersut. Aamma isiginnaartut ilaat 29-nik ukiulik qanoq ililluni aalakooqaluni akornuserneqarani arsaattarfimmut isersinnaanersoq dommerilu saassuteriaraluarlugu.
Danmarkip Sverigillu unammineranni isumannaallisaaneq pitsaavallaanngilaq. DBU-p Parkenimilu siulersuisut tamanna ullumikkut oqaluuserissavaat. DBU-meersullu kamassimasorujussuupput.
Parkimut isertarfiata eqqaani vodkanik imigassanillu sakkortuunik allanik tuniniaasoqartarpoq. Naak arsaannermi nunat tamat akornanni kattuffissuup isiginnaartut akornanni ernguttarneq killilersimaarniaraluaraa immiaaraannarnillu tuniniaasoqarnissaa piumanerugaluaraa.
- Imigassanik sakkortuunik tuniniaasoqarneratigut arsaattunik isiginnaartarfik imerniartarfippalaarnerulertarpoq tamannalu nuannersuunngilaq, DBU-p siulittaasua Allan Hansen oqarpoq. Imigassanillu sakkortuunik tuniniaasarneq arsaattarfissuarmi isumannaatsuunissamut akornutaanerarlugu. Taamaattumik imigassanik sakkortuunik tuniniaasarfiit Parkenimiit eqqaaniillu peerneqartariarput.
- Arsaattarfissup nunanut allanut unammisoqartillugu aningaasannanniarsinnaanera apeqqusinngilarput, kisianni uagut kattuffittut arsaannermik ingerlataqartutut qanoq periaaseqartoqarnersoq soqutigilluinnarparput, Allan Hansen oqarpoq.
Imigassaarniarsinnaanermik akuersisartut arsaattarfissuup silatinnguani immiaaqqanik imigassanillu sakkortuunik tuniniaasinnaaneq 2013-ip tungaanut akuerisimavaat.