Aalakoorlutik umiatsiaararsortut pineqaatissinneqartalissapput

Ukioq manna juulip aallaqqaataanit atuutilersussamik imigassartorsimatilluni immakkut angalaneq inerteqqutaalissaaq.

Aningaasaqarnermut inuussutissarsiornermullu ministerip Bendt Bendtsenip siunnersuutaa Folketingimi tapersersorneqarmat, tamanna inerteqqutaalissaaq.

Folketingimi ilaasortat tamarmiullutik isumaqatigiinneratigut siunnersuut akuersaarneqarpoq, taamalu inatsisinngortussanngorluni.

Aalakoornartup aammi promilia qummut 0,5-i qaangersimappagu, inuussutissarsiutigalugulu angallassisoqarsimappat, imaluunniit angallammik nuannaariartaammik angallassisoqarsimappat, taava pineqaatissiisoqarsinnaalissaaq.

Aammattaaq pineqaatissiisoqarsinnaalissaaq, imigassartorsimatilluni sukkasuuliamik angalasoqarsimappat imaluunniit vandscooterinik taaneqartartunik angalasoqarsimappat.

Folketingiminngaanniillu tapersersorneqarnini, Bendt Bendtsenip assut nuannaarutigeqaa:

- Imigassartorsimatilluni angallattoqartarnera akuersaarnanngilluinnartoq takutinneqarpoq, aammattaaq immakkut angalaneq eqqarsaatigissagaanni, siunnersuusiortoq nutaarsiassaqartitsivimmut Ritzauimut oqarpoq.

Inatsisissaq nutaaq Imarsiornermik Ilinniarfiup pisortaanit, Lars Wall-Andersenimit aamma tikilluaqquneqarpoq:

- Kalaalli Nunaanni umiatsiaararsorluni ajutoortarnerit amerlasuut imigassartorsimanermik peqquteqarajuttarput, taamaammat inatsisissaq tikilluaqqunaqaaq, Lars Wall-Andersen oqarpoq.

Imigassartorsimatilluni angalasarneq akiorniarlugu inatsiseqalertariaqartoq ilaatigut Danmarkimit noqqaassutigineqarsimavoq, FN-illu imarsiornermik peqatigiiffianni, IMO-mi, maajimi isumaqatigiittoqarpoq taamaattumik inatsiseqalissasoq.