Aalakoorlutik biilertut amerleriarsimasut

Aalakoorlutik biilertut 2013-imit 2017 tungaanut 25 procentimik qaffariarsimapput. Kalaallit Nunaanni Naatsorsueqqissaartarfimmit kisitsisit taama takutitsipput.
Allattoq Mette Wallach
decembarip 16-at 2018 17:07

Tassami 2013-imi aalakoorlutik biilersimasut 135-upput, 2017-imilu 167-ilullutik. 2014-imili ikileriaateqarsimagaluartut atuarneqarsinnaavoq, tassanimi aalakoorlutik biilersimasut 101-iummata. 

Tassanilu nakorsaatitorsimallutik biilertut naatsorsuinermi ilaatinneqarput. 

Naatsorsuinerit politiit nalunaarusiaannit aallaaveqarput.

AAMMA ATUARUK Imigassaq pillugu inatsit sukannerpallaarunnaassaaq

Aalakoorlutik biilersimasut kisimik amerleriarsimanngillat, tassami 2013-imit 2017 tikillugu angallannermut inatsimmik unioqqutitsisimasut nalunaarsorneqarsimasut tamarmik qaffariarsimammata. 

Biilerlutilli oqarasuaatinik angallattakkanik atuisut qitequtaasallu isumannaallisaatit atornagit biilersimasut ikileriarsimapput. 

Angallannermut inatsit oktoberip aallaqqaataani 2008-imi allanngortinneqarpoq, ilaatigut qitequtaasat isumannaallisaatit atorneqartalernissaannik oqarasuaatillu angallatakkat biilernermi atoqqusaajunnaarnerannik imaqartumik. 

AAMMA ATUARUK Imigassaq pillugu inatsit atulersinneqarmat tunisat amerlipput

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq