Aalajangiisarnerit akeqarput
Naalakkersuisoqarfinni marlunni annertuumik sunniuteqartunik ilaannilu nuannarineqarpianngitsunik aalajangiiffiusartuni Demkraatineersut naalakkersuisuunikuupput. Palle Christiansen ilinniartitaanermut naalakkersuisutut tusagassiuutitigut illuatungiliuttunillu isornartorsiorneqartarnikuuvoq. Taannali peqqissimissuteqannginnerarpoq.
-Nunap pisariaqartitai suliarinikuuagut, tamannalu tulluusimaarutigiinnarsinnaavarput. Maanna neriuutigiinnarsinnaavara naalakkersuisooqatigiilersussat allanngortiterissanngitsut. Nunatsinni nutarterisoqartariaqartoq kialluunniit takusinnaavaa, tamaammat inuit taamatut qinersinerat eqqumiiginarpoq. Aalajangiiffigisassat ataasiakkaarlugit siunissami sunniuteqarfiginiartassavagut, taamatut nutarterinerput ingerlatiinnarniarlugu, Palle Christiansen knr.gl-imut oqaluttuarpoq.
Ukiuni sisamani qaangiuttuni IA-p, Demokraatit kiisalu Kattusseqatigiit Partiiata aningaasaqarniarneq ilorraap tungaanut aallartippaat Kalaallit Nunaannilu ineriartorneq aallartisaqqillugu. Karsimi aningaasaateqarpugut, siunissamilu naalagaaffittut aatsitassarsiortunngornissamut alloriartoqarluni. Tamatuma ingerlateqqinnissaa maanna Aleqa Hammondip suleqatissaasalu isumagisussanngorpaat.
-Maannakkut naalakkersuisooqatigiilertussat pissutsit aallaavissaat uagut aallartinnitsinni pissutsinit aallaavigisatsinnit ajunnginneroqaat. Landskarsimi 600 miliuuninik taakkua atorsinnaasaannik imaqarpoq. Uagut aallartikkatta illuatungiliuttut oqaraluarput Landskarsi 2,6 miliaartinik imaqartoq, taamanili imaqanngingajavippoq. 1,6 miliaartit sanaartornissamut aningaasaateqarfimmi pituttorsimapput, kiisalu Royal Greenland annaanniarlugu miliaartit affaannik aningaasaliiffigisariaqarsimavarput aningaasartuutillu allat 400 miliuuni koruuninik naleqarlutik. Taamani pituttorsimalluta iliuuserisinnaasavut killeqaraluaqisut, unammilligassat naammassisimavagut suliarinikuusavullu tulluusimaarutigilluarsinnaallutigit. Sulerulunnittalu kinguneri maannakkut allat iluaqutigisussanngormatigit uggornaannarpoq, Palle Christiansen isumaqarpoq.
