Aalajangiinerit pillugit maalaarsinnaatitaaneq immikkuullarissoq atorunnaassaaq
Tamanna aatsitassanut ikummatissanullu inatsisip allannguutissaatut Naalakkersuisut siunnersuutaata kingunerissavaa.
Aatsitassanut tunngasuni allagaatinik takunnissinnaanermut periarfissanik killiliiniarnermut tunngavilersorneqarpoq, pappialaatinik, assigiinngitsunik peqquteqartumik tamanut takusassiarineqartussaanngitsunik, naalakkersuisoqarfiit akunnerminni parlaateqatigiiittarnissartik akuttunngitsumik pisariaqartittassagaat.
Maalarnissamik periarfissaq sooq atorunnaassanersoq nassuiaaserneqarsimanngilaq.
IA-meersoq Naaja Nathanielsen maalaarsinnaalersitsiniarluni ilungersorsimavoq, taamatullu periarfissap nassuiaatitaqanngitsumik atorunnaarsinniarneqarnera narrujuummissutigaa.
- Soorluuku arajutsisitsiniartut. soorluuna toqqortorlugu atorunnaasitsiniaasut, uffa taamaaliorniarnertik ammasumik oqallisissiarigunikku, taamaaliorpata oqaloqatiginnissutigisinnaagatsigu. Allarpassuarnut matoorullugu saqqummiummassuk kusaginngilara, Naaja Nathanielsen oqarpoq.
Inatsisilerinermut immikkoortoqarfimmi siunnersortit pisortaat, Jens Hesseldahl, nassuiaavoq, maalaarsinnaanermik atorunnaarsitsiniarneq susassaqarfimmik pisarnertut ilersitsiniarnerinaagaluartoq, taamaalilluni pisarneq nalakkersuiosoqrfinni allanitulli ilissammat. Maalaarnissamut suli periarfisaqassaaq, taama periarfissaq immikkuullarissuujunnaaginnarluni. Jens Hesseldahl aamma nassuiaavoq, maalaarsinanatitaarnermik tamattuminnga atuisoqarsimaneranik eqqaamasaqarani.
Taamaakkaluartoq maalaarsinnnaatitarnerup atorunnaarsinniarnera nassuiatitaqanngimmat, Naaja Nathanielsenip tupigusuutiga.
Siumut illua'tungiliuttuugallarmat aatsitassarsiornermut tunngasuni ammanerusumik ingerlatsinissamik ujartuisut suartartaqaat. Taamaammat Naaja Nathanielsenip illua'tungiliuttuusimasut, tasssalu maanna pissaaneqartuusut, ilisariuminaatsippai:
- Oqaatigisartagaannut tulluutinngilluinnarpoq. Iliuuseriniagaat illua'tungerluinnaanut sammivoq. Aatsitassanut ikummatissanullu inatsimmi maalaarnissamik periarfissaqarnissaanut qinigaaffiup siuliani sorsuuteqaqisunut ilaavunga, massakkullu ataatsimilluunniit oqasertalernagu peernialerpaat. Eqqumiippallaaqaaq, Naalakkersuisullu tamatumunnga tunngavilersuutissaat tusassallugit qlanaarilereerpara, tunngavilersuutigisinnaasaannimmi takujuminaatsitsivunga, Naaja Nathanielsen oqarpoq.
