Aalajangiineq ingerlateqqinnianngilaat
Suliaq 2010-mi nipisanniarnermut tunngassuteqarpoq, tassani Royal Greenland unammilleqatigiinnermi unioqqutitsilluni, aalisartunik nipisat suaannik suliffeqarfimmut tunisisartunut aasaanerani saarullinnik tunisinissami salliutitsinissamik neqerooruteqarsimammat.
Tamanna Unammilleqatigiinnermut Nakkutilliisoqarfiup Royal Grenlandimut suliassamik aallartitsineranik kinguneqarpoq, taamatullu periaaseqarneq akuersaarneqarsinnaanngitsoq Eqqartuussivik sapaatip-akunnerani kingullermi aalajangerpoq.
Aalajangerneq pillugu Royal Greenland inatsisitigut siunnersortini peqatigalugit maanna misissuisimalerpoq, ingerlatitseqqittoqassanngitsorlu aalajangiunneqarluni.
- Aalisartut nipisat suaannik tulaassuinerannut atatillugu saarullinnik tulaassuinermi salliutinneqarnissaannik 2010-mi neqerooruteqarsimanerput naleqquttuusimanngilaq, taamaattumillu aamma tamanna pillugu allagarsiisimanerput ullut marluinnaat qaangiuttullu peerparput, pisortaaneq Mikael Thinghuus oqarpoq, nangillunilu:
- Aallaavittut eqqartuussinermi inerniliunneqartoq isumaqatiginngilarput, taamaattorli suliffeqarfiup ingerlanneqarnera eqqarsaatigalugu suliassamut nukinnik atueqqinnianngilagut.
Aqutsinermi pisortap, Nicolai Odgaard Jensenip, Unammilleqatigiinnermut Aqutsisuneersup, eqqartuussinerup inernera naammagisimaarpaa, naak Royal Greenland akiligassinneqarnani naveersiinnaraluartoq.
- Suliffeqarfinnut pingaaruteqarnerusunut, soorlu Royal Greenlanditut ittunut, unammilleqatigiinnermi pitsaasumik pissusilersornissamik eqqartuussinermi inernerusoq tikkuussisuusoq, Nicolai Odgard Jensen oqarpoq.
