Aslak Jensenip unnerluussaasinnaatitaannginnermi atorunnaarsinneqarnissaanik parteeqatini kaammattorpai, taamaalilluni eqqartuussivimmi sassarsinnaaniassagami.Assi: Malik Brøns, KNR

Aalajangerneqarpoq: Aslak Jensen toqutsinissamik siorasaaruteqartutut eqqartuussissutigoortinneqassaaq

Aslak Jensenip unnerluutigineqarsinnaannginnerata atorunnaarsinneqarnissaa Inatsisartuni isumaqatigiiffiusumik akuerineqarpoq. Tamanna Aslak Jensenip eqqissisimasumik tiguaa, taassumalumi Siumumi parteeqani atorunnaarsitseqqullugit kaammattuuteqarfigisimavai.

Siumumit qinigaanerpaat pingajuat, Aslak Jensen eqqartuussivimmut sassartinneqarsinnaallunilu toqutsinissamik siorasaaruteqartutut unnerluutigineqarsinnaavoq.

Inatsisartut tamanna aalajangerpaat – imaluunniit pitsaanerusumik oqaatigalugu: Aslak Jensenip unnerluutigineqarsinnaannginnerata atorunnaarsinneqarnissaa Inatsisartut akuersissutigaat. Inatsisartunimi ilaasortat politiinit unnerluutigineqarsinnaanatillu eqqartuussivimmi suliamut sassartinneqarsinnaanngillat.

Tamanna Inatsit tunngaviusuni allassimavoq – taakkulu unnerluutigineqarsinnaannginnerata atorunnaarnissaannut – taamaalillutillu unnerluutigineqarsinnaanissaannut eqqartuunneqarsinnaanissaannullu – Inatsisartut taasissuteqaqqaartassallutik.

Tamannalu Inatsisartut akuersissutigaat. Tamannalu Aslak Jensenip ajorinagu KNR-imut oqaatigaa.

Unnerluunneqarsinnaannginnerit maanna atorunnaarsinneqartoq qanoq igaajuk?

- Tassa uanga nammineerlunga Siumumi immitsinnut tatigeqatigeeqqissaarluta peqqunikuuakka toorseqqullugit. Una pisoq qulaajarneqarnissaanut eqqartuussivimmut peqqullugu.

Pasilliutigineqartut qanoq igaagit?

- Eqqartuussinermi ajugaasinnaassallunga isumaqarpunga. Uannit oqaatigineqarsimaneraanerit eqqortuusorinngilakka.

Qanoq kinguneqassappat?

- Piffissaq, aliasunneq.

Maannakkumillu- tamanna sulininnut sunniuteqassava?

- Naagga.

Sooruna unnerluussaasinnaatitaannginnivit atorunnaarsinneqarnissaanut kaammattuivit?

- Eqqartuussivimmi sassarnissara ernumassutiginnginnakku.

Eqqartuussivimmi suliaq 2017-imeersoq

Aslak Jensen inunnik isumaginnittumut politiinullu siorasaaruteqarsimasutut pasineqarpoq.

Tamanna unnerluussissummi KNR-ip allagaatinik takunnissinnaaffigisaani allassimavoq.

Aslak Jensen Kommuneqarfik Sermersuup inunnik isumaginnittoqarfianut 2017-imi martsip 17-iani nalunaaqutaq 12:45-p missaani sianersimavoq, tassanilu isumaginninnermik sulialik toqunniarlugu siorasaarsimallugu.

AAMMA ATUARUK Inatsisartunut ilaasortaq toqutsinissamik siorasaarisimasutut unnerluutigineqartoq: Pinngitsuunerarpoq

Unnerluussisummi allassimasut malillugit Aslak Jensen ilaatigut ima oqarsimavoq:

- Ilissi politeersuillu toqorassuassi.

- Kinaanerit ujartussuakkit. Utaqqilaarit toqussuakkit.

Taamaalilluni isumaginninnermi sulisup inuunerminik, peqqinnerminik atugarissaarnerminillu unnerluussummi allassimasut naapertorlugit assut ersiortilerlugu.

Pinngitsuunerartoq

Taassuma eqqartuussissuserisuata, Finn Meinelip Aslak Jensen unnerluussissutini pinngitsuunerartoq oqaatigaa.

Unnerluussisussaatitaasut ulluni 30-ni pineqaatissinneqarsimasunut inissiisarfimmiitsitsisoqarnissaa piumasaraat.

Siumumit politikerip unnerluutigineqarsinnaannginnera atorunnaarsinneqaqqaartussaanera pissutigalugu eqqartuussinissamut suli ulluliisoqanngilaq.

Aslak Jensen taamaalilluni Siumut sinnerlugu qinikkani saqqumilaarnerit, inatsisartunut kommunimullu qinersinerup kingorna eqqartuussivimmut suliassanngortinneqartut eqqartuusaasulluunniit pingajorilerpaat.

Minik Høegh Dam Avannaata Kommuniani qinerneqarnerpaatut borgmesterinngortussatut inissereeraluarluni uppisinneqarpoq. Taanna ikiaroornartut pillugit unnerluunneqarpoq. Minik Høegh-Dam eqqartuussivimmi pinngotsuutinneqarpoq, unnerluussisussaatitaasulli suliaq Nunatta Eqqartuussisuuneqarfianut suliareqqitassanngortippaa.

Taassuma nukaa, Siumummilu Inatsisartunut qinerneqarnerpaat ilaat, Qarsoq Høegh Dam, qinersinerup kingorna Inatsisartuni ilaasortaanissamut piukkukkunnaarami nammineerluni ilaasortaajunnaapoq. Ikiaroornatoq pillugu eqqartuussaasimasuusoq saqqummiunneqareersorlu tamanna pivoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat