Aajuna Nunatta Canadallu killeqarfiat
Isumaqatigiissutip, killeqarfik pillugu 1973-imi isumaqatigiissutaagallartoq taarserpaa, pineqarporlu titarneq 3.000 kilometerinik takissusilik, Kalaallit Nunatta kujasissuani immamiit, Davis-Stræde aqqusaarlugu, Baffindip Kangerliumarngatigoorluni Kalaallit Nunatta avannaani Issittup Imartaaniittoq.
Villy Søvndalip erseqqissaatigaa isumaqatigiinniarnerit Kalaallit Nunaat qanimut suleqatigalugu pisut, Ilulissanilu 2008-mi isumaqatigiissummi najoqqutassat maleqqissaarlugit pilluni, isumaqatigiissummi tassani aalajangerneqarpoq, Issittumi ajornartorsiutit isumaqatigiinniarnikkut pisassasut.
Illuatungeriilli immikkoortuni marlunni isumaqatigiinngillat.
Tartupaluk, Kalaallit Nunatta Canadallu tamarmik oqartussaaffigerusutaat, suli assortuussutaavoq. Uuliaqarfiit gasseqarfiillu tassani killeqarfimmiittut qanoq agguataarneqassanersut suli ersarissinngitsoq, aviisimi Politikenimi allapput.
- Tartupaluk pillugu oqallinnerit eqqissisimasumik pipput, qaquguli naammassissanersut maanna suli oqaatigisinnaanngilarput, Villy Søvndal oqarpoq.
Nunanut allanut tunngassuteqartunut ministerip, Villy Søvndalip, Canadamut tikeraarnermini Canadami illersornissamut ministeri, Peter MacKay, peqqissutsimut ministeri, Issittumi Siunnersuisoqatigiinni aamma siulittaasuusoq, Leona Aglukaq, aamma Candami naggueqatigiit Inuit peqatigiiffiani, ITK-mi, præsidenti, Terry Audla, ullumi ataatsimeeqatigissavai.
