Aajuna nunaqarfimmiut illussaat

Nammineerluni ikiorteqarlunilu illuliarineqartartoq Illorput 2000 sananeqarunnaassaaq, illu sanallugu pisariuallaarmat.
Allattoq Ludvig Siegstad
maajip 10-at 2012 11:20

Ikiorteqarluni illuliarineqarsinnaasoq nutaaq taaguuteqarpoq Illorput 2100. Taanna maannakkut pilersaarusiorneqaleruttorpoq. Nunaqarfinni avinngarusimasunilu nammineerluni ikiorteqarlunilu illu ukiuni kingullerni  sananeqartartoq Illorput 2000, 463-nik sananeqarsimasoq Illorput 2100-mik taarserneqartussanngorpoq.

Illorput 2100-mik saneqarsinnaasut  annertussusaat assigiinngitsuupput, angineq 105 kvadratmeteriulluni mikineq 80 kvadratmeteriulluni.

Illorput 2100-p pilersaarusiorneqarneranut atatillugu erseqqissarneqarpoq illu sanaartornermik misilittagaqanngikkaluartumik  ikiorteqarluni sananeqarsinnaassasoq.

Illorput 2100-p aamma pilersaarusiorneqarnerani Illorput 2000-mik nammineerluni ikiorteqarlunilu illuliortarsimanermit misilittakkat tunngavigineqarput.

Naatsorsuutigineqarpoq Illorput 2100-ut siulliit kommunini misiligutaasumik sananeqassasut, atortussaat Namminersorlutik Oqartussanit akilerneqarlutik, sananeqarneri kommuninit akilerneqartut.

- Misiligutaasumik illuliarineqartussat kommuninut agguaanneqassapput, inunnut ataasiakkaanut sanaartugassanngortinneqaratik, Olafur P. Nielsen, Ineqarnermut, Attaveqarnermut Angallannermullu Naalakkersusioqarfimmi pisortaq erseqqissaavoq.

Aningaasanut ukioq mannamut inatsimmi Illorput 2100-ip pilersaarusiorneqarneranut naammassiniarneranullu 9 million koruunit aningaasaliissutaapput.

Ilimagineqarpoq Illorput 2100-p sananeqarneranut kvadratmeterimut Illorput 2000-mut maannakkut akigitineqartartoq akeqqatsigiumaaraa.

Illulioqataaniartup aningaasarsiarisartai nammineerluni akiliuteqarnissamut tunngaviussapput.

- Naalakkersuisut tamarmiullutik Illorput 2100-mut ajunngitsumik neriuuteqarput. Illuliarineqarsinnaasoq assigiinngitsunut atorneqarsinnaakutsoormat, illuinnartut atorani iluarinarpoq, Jens B. Frederiksen, Ineqarnermut, Attaveqarnermut Angallannermullu Naalakkersuisoq, oqarpoq.