Aajuku meeqqat kissaataat

Iluliarmiut Nuummiullu meerartaat juullimut assigiinngitsunik kissaateqartarput, tamanna erserpoq illoqarfinni taakkunani marlunnik tunissutissarsiniarneq KNR-imit tipisiorneqarmat.

Nuummiut meerartaasa fodboldkort-inik taaneqartartut pilerngukkaat  Ilulissani meerarpassuit Nintendo DS 3 D kissaatigaat, niuertarfimmi Knud Pedersen A/S-imit John Pedersen taama ilisimatitsivoq.

- Aamma Nuummi Ilulissanilu meeqqat kissaataat assigiinngillattaasarput, John Pedersen Nuummi pinnguarniaarfinnut tusarniaallattaasartoq oqarpoq.

Lego ukiormanna aamma nuannarineqarluarpoq Ninjago nuannarisaaqimmat kiisalu biilit pinngussallu titartakkani filmiliamit Cars 2-meersut.

Aamma niviarsiaqqat juullimut kissaataat inuusanut nutaanut Monster High-inut sammingaatsiaraluartut alutornartortaqarput.

- Maluginiarparput meerarpassuit inuusat Barbaopapa-meersut kissaatigigaat. Imaassinnaavoq angajoqqaavisa 1970-ikkunni pinnguarisarsimasatik aliannaarfigalugit meeqqaminnut ilisaritissimagaat, John Pedersen oqarpoq.

Akisunerumaallu eqqarsaatigalugit helikopterit ungasianiit aquttakkat video-liuutillit tunisaalersimapput. Taakkugooq assilisaat qarasaasiamut nuunneqarsinnaapput usb-kkut ikkuffik atorlugu.