Aajuku Maryp tikeraarnerani pisussat
Kunngissap nulia Mary Ilulissanut tikissaaq juunip sisamaat kunngikkormiut sulisui, Mary Fondenimeersut, Red Barnetimeersut aamma Lego Fondenimeersut angalaqatigissallugit.
Kunngeqarfiup Danmarkip Dronningissaata Qeqertarsuup tunuanut tikeraarnerani pingaarnertut sammineqassaaq qinngasaarisarneq akiorniarlugu suliniut Kammagiitta. Tassani pingaarnertut oqariartuutaapput toqqissisimanartumik meeqqat ataatsimoornissaat, akaareqatigiinneq, ataqqeqatigiinneq, qanilaarneq sapiissuserlu.
Kunngissap nulia Ilulissanut tummatsiaannariarluni Ilulissat avannaani nunaqarfimmut Saqqamut ingerlaqqissaaq marlunngorneq juunip tallimaat. Tassani meeqqerivik pulaassavaat tassanilu meeqqat takutinniarpaati Kammagiittap suliniutaanit assersuutissat.
Angalaqatigiit Ilulissanut utissapput pingasunngorneq juunip arfernat tassanilu ilaatigut pulaarniarpaa Atuarfik Jørgen Brønlund. Tassani meeqqat erinarsorlutillu Kammagiittap imarisaasa ilaanik takutitsiniarput.
Juunip arfernat matoqqasumik aamma aaqqissuussisoqarniarpoq kunngissap nulia qimarnguipput pulaarniarmat.
Qinngasaarisarneq akiorniarlugu suliniut pilersinneqarpoq Mary Fonden-ip, kunngissap nuliata siulersuisuni siulittaasuuffigisaata, Lego Fondenip, Red Barnetip, kommuunit, kommuunit kattuffiata Kanukokap Naalakkersuisullu suleqatigiinnerisigut.
- Assorsuaq tulluusimaarutigalugulu nuannaarutigaarput suliniut Kammagiitta Kalaallit Nunaanni siuaruarluarmat. Maanna qilanaararput kalaallit suliniutip malunnartinniarnissaanut suliniummi aqqutigalugu kalaallit meerartaat sakkussalerneqassapput qinngasaaruttarnerup akiorniarnissaanut peqqinnartumillu meeqqat ataatsimoornissaasa siuarsarnissaanut, Mary Fonden-imi siulittaasoq Helle Østergaard oqarpoq.
Suliniut tassunga assigusoq Danmarkimi 2007-mi aallartinneqarpoq tamatuma kingorna perorsaasut ilinniartitsisullu 90 procentiisa nalunaarutigaat ilorraap tungaanut allanngorneqartoq.