Aajuku Avannaa Arctic Gamesimi Nunatta unammisitassai

Issittormiut timersuutaanni Arctic Sportsimi Dene Gamesimilu issittumi pikkorinnersiukkat unammisinneqarnerat nutaaq februarimi pissaaq.
Kalaallit Arctic Winter Gamesimi martsimi unammisitaat. Taakkunani arlallit februarimi unammeqqittussanngorput Assi © : AWG 2024 - Zack Pavlik
Allattoq Noah Mølgaard
decembarip 17-at 2024 13:11

Arctic Sportsimi aamma Dene Gamesimi nuna tamakkerlugu sungiusaasut issittormiut unammiuaarnissaanni nutaami Avannaa Arctic Gamesimi Nunatta unammisitassaanik toqqaapput.

Arctic Sports naggueqatigiit inuit timersuutigaat Dene Games eqqillit inerisagarigaat. Taakku assigiissutigaat issittumi peqqarniissinnaasumi najugaqaannarsinnaajumalluni timikkut eqqarsartaatsikkullu piginnaasatigut sungiusaataagamik.

Ullutsinni timersuutit taakku sukisaarsaatitut aallunneqarput ukiorlu allortarlugu Arctic Winter Gamesimi unammissutaasarlutik. Maanna Avannaa Arctic Games aallartilerpoq Avannaata Kommunia aaqqissuisoralugu.

- Ilimagaara unamminerit pitsaassusaat Arctic Winter Gamesimisut qaffasitsigiumaartoq. Unammersuarneq nutaajuvoq. Taamaattumik ilimagaara nunat peqataasussat angusarissaarniarlutik pikkorinnersiukkanik aallartitsiumaartut, Arctic Sports Greenlandimi siulittaasoq Kim Rosing KNR-mut oqarpoq.

Amerlanerit peqataarusukkaluarput

Nunat peqataasussat tassaapput Alaska, Nunavik, Nunavut soorunami aamma Nunarput.

Nunat Arctic Winter Gamesimi peqataasartut soorlu Alberta aamma Nordvest territoriet maanna peqataanngillat.

- Martsimi Arctic Winter Gamesertuniikkatta malunnareerpoq Nunatsinnukarnissamut soqutiginnittoqartoq. Maanna Avannaata Kommunia aaqqissuisuuvoq taakkulu peqataasut amerlassusaat appasitsikkallarpaat, Kim Rosing oqarpoq.

Tamanna Avannaata Kommunianit uppernarsarneqarpoq, siullerpaamik aaqqissuunneranni amerlassutsit nakkutigiuminartut aallarniutigineqarusummata.

Arctic Sportsimilli Dene Gamesimillu aallussisut ukiuni avinneqarsinnaasumik kisitsisitalinni Arctic Winter Gamesimi unammereeraangamik ukiuni avinneqarsinnaanngitsunik kisitsisitalinni Avannaa Arctic Gamesimi unammisassapput.

- Neriuppugut timersuutitsinnik aallussisut amerlinerannik tamanna kinguneqarumaartoq. Maanna issittormiut ukiut tamaasa unammisalissapput unammisartuutittalu pikkorinnerulernerannik tamanna kinguneqarsinnaavoq, Kim Rosing oqarpoq.

Avannaa Arctic Games

Kalaallit peqataatitassaat tassaapput:

Arctic Sports

Inuusuttuaqqat:
Randi Zeeb Sigurdsen
Lars Muumu Jeremiassen

Inersimasut:

Arnat:
Petra Amossen

Angutit:
Inuuteq Josefsen
Mads Thomassen

Steffen Knulst

Sungiusaasoq: Qasiaq Lange

Dene Games

Inuusuttuaqqat:
Majka Qvist
Aqqalu Lukassen

Inersimasut:
Arnat:

Dorthe Qvist
Kirstine Sigurdsen
Nuunuutaa T. Nielsen
Aaka T. Karlsen

Angutit:
Minik Møller Platou
Edvard Kruse
Peter Qujaukitsoq Peary

Sungiusaasoq: Alfred Lindenhann