Aajuku angusaat

Nassuiaatit apeqquteqaallu aallaavigalugu oqallisissiat arlaqartut ingerlatereerlugit, inatsisit 18-it nutaat akuersissutigineqarput. Inatsisissatut siunnersuut ataaseq kisimi upernaamut kinguartinneqarpoq.

Ukiup tullianut aningaasanut inatsisissaq eqqaassanngikkaanni, ilaatigut oqimaannerit arlalinnguit, soorlu aalisarnermut inatsit ukiorpaalussuit passunneqarsimalluni maanna nutarterneqartoq, Ilinniarnertuunngorniartarnerup annertuumik iluarsatuuteqqinneqarnera kiisalu avatangiisit pillugit inatsit nutaaq, suliffeqarfiit namminneq mingutsitsinerminnut akiliisalernissaanik kinguneqartussaq aamma akuersissutigineqarput.

Aammattaaq aalajangiunneqarpoq, Kalaallit Nunaat Meeqqat pillugit Oqaaseqartartusamik kiisalu Meeqqat pillugit Ataatsimiittartoqatigiinnik pilersitsisoqassasoq.

Sanaartornerup iluani neqerooruteqarsinnaaneq pillugu inatsit aamma akuersissutigineqarpoq. Tamanna siunissami aningaasat kisiisa eqqarsaatiginagit, kisiannili suliffeqarfiit ilinniartuuteqarusunnerannik aallaaveqarluni kikkut sanaartugussanik tigusisinnaalernissaat pillugu Naalakkersuisunut toqqaanissaannut pisinnaatitsilissaaq.

Ileqquuvoq inatsisissatut siunnersuutit piffissarititaasoq inatsisitigullu toqaammavissat misissorluareerlugit Naalakkersuisunit saqqummiunneqartarnerat. Tamatumuunakkullumi  inatsisissatut akuersissutaasuni 18-isunit 15-ini taamaliortoqarpoq.

Uanili ataatsimiinnermi maluginiagassaavoq, inatsisartunut ilaasortaq ataaseq inatsisissatut siunnersuuteqarsimammat. Allaammi marluk saqqummiunneqarput. Tamarmik Niels Thomsenimit Demokraatineersumit saqqummiunneqartut, tamarmillu akuersissutigineqarlutik. Aappaa naalakkersuinikkut partiit naatsorsuutaasa kikkunnit tamanit takuneqarsinnaalernissaanut tunngassuteqarpoq.

Inatsisit akuersissutigineqartut saniatigut, Naalakkersuisut sorpassuarnik iliuuseqaqqullugit inatsisartunit pisussaaffilerneqarput. Aalajangiiffigisassatut siunnersuutit 23-t akuersissutigineqarput.

Assersuutigalugu IA-meersup Naaja Nathanielsenip ilungersuutaa siulersuisuni angutit arnallu naligiissitaanissaannik qulakkeerinnittussaq. Taanna Demokraatit avaqqullugit amerlanerussusiinikkut akuersissutigineqarpoq.

Siumumeersup Doris Jakobsenip siunnersuutaa, Brønshøjimi Rigshospitalimilu kalaallit napparsimasut kalaaliminernik nerisinneqartalernissaata aningaasaliiffigineqarnissaa taperserneqarpoq.

Tamatuma saniatigut Naalakkersuisut, CO2-mik aniatitsinerup annikillisinneqarneranik kinguneqartussamik  silap pissussaanut tunngaasumik paasisitsiniaanermik ingerlataqassapput, soorlu aamma atuarfinni meeqqat aallarteqqaarnerminniit tuluttut ilinniartinneqartalernissaat sulissutigineqassasoq.

Naggataatigullumi tunngaviusumik inatsisissamik suliaqartussamik Naalakkersuisut  suleqatigiissitaliornissaat inatsisartunut ilaasortat isumaqatigiittut aalajangiuppaat.

Upernaakkut ataatsimiinneq tallimanngornermi apriilip 13-iani aallartissaaq.