Aajuku aappaagu arfattassat
Nunatta imartaani arfanniartartut arferit angisuunik taaneqartartut sisamat assigiinngitsut pisarisinnaavaat, pisassallu amerlassusaat maanna Naalakkersuisut aalajangersarpaat.
Aappaagu tikaagulliusaat qulit pisarineqarsinnaapput arfanniarnerlu januaarip aallaqqaataaniit decemberip 31-ianut pisinnaavoq. Aammattaaq arfiviit pingasut pisarineqarsinnaapput apriilip aallaqqaataaniit decembarip 31-ata tungaanut. Arfivinniarnermi angallatit Qeqertarsuup tunuamiut salliutinneqarlutik arfivinnik kapisisinnaatitaassapput.
Aappaagu aamma qipoqqarnik pisaqartoqarsinnaassaaq pisassat qulingiluaassallutik qipoqqarniarnerlu pisinnaavoq apriilip aallaqqaataaniit decembarip 31-ata tungaanut.
Arfattassani pisarineqarsinnaasut amerlanerpaat tassaapput tikaagulliit. Kitaani tikaagullittassat aappaagu 178-ussapput sulilu amerlanerusinnaapput ukiormanna pisarinngitsuukkat amerlanerpaamik 15-it aappaagu pisassanut nuunneqarsinnaammata. Namminersorlutik Oqartussat taama ilisimatitsipput.
Tunumi aappaagu tikaagullittassat aqqaneq marluupput amerlanerpaamillu ukiormanna pisarinngitsuukkat pingasut aappaagu pisassanut nuunneqarsinnaapput.
