Assi: Inuit Ataqatigiit

Aajap danskit partiivi kamaappai

Oqaluttuarisaaneq eqqarsaatigalugu uggornarpoq, naalagaaniarneruvoq taamatullu takutinneqarpoq qanoq Kalaallit Nunaat kalaallillu ataqqinngitsigalugit. Taama erseqqitsigisumik Inuit Ataqatigiinneersoq Aaja Chemnitz Larsen oqarpoq, Venstreneersup Marcus Knuthip Kalaallit Nunaat pillugu ataatsimiititaliamut siulittaasunngortinneqarmat.

Ukiut 20-it ingerlaneranni aatsaat kalaaliunngitsumik tassani inuttaliisoqarpoq, tamannalu IA-p nuannarinngilaa.

- Isumaqarpunga assorsuaq uggornartuusoq Kalaallit Nunaannik nunatsinnilu pissutsinik ilisimasaqariinngitsumik folketingimi ilaasortamik danskiusumik inuttaliisoqarmat, folketingimut ilaasortaq Aaja Chemnitz Larsen oqarpoq.

Nunatsinni folketingimut qinersinermi Inuit Ataqatigiit amerlanerpaanik taaneqarput, taamaattumik naatsorsuutigisimagaluarpaa tassunga inuttaliutissalluni. Kalaallit ilaasortaatitaat marluullutik saamerlernik suleqateqarput arlaallu siulittaasunngortinnagu taarsiullugu naalakkersuisut aalajangerput talerperlerneersumik siulittaasunngortitsissallutik.

Aamma atuaruk Aaja qaangerlugu Aleqa atuuffeqalerpoq

Akiliutigerusunngilaa

IA siulittaasunngortitsinissaq pillugu Venstrenik isumaqatigiinniarsimavoq. Taakkuli piumasarisimavaat Danmarkimi nunap iluanut tunngasut taasissutigineqarnerini IA angernaniluunniit naaggaartassanngitsoq. Inuit Ataqatigiilli tamanna akiliutigerusussimanngilaat.

- Naamik taamaalioraluarutta ilaasortaatitarput akigissavarput. Ilaasortatummi allatulli folketingimi ilaasortaavugut.

Aaja Chemnitz Larsenip erseqqissarpaa periaaseq uani tassaammat pituttorsimasuunnginnissaq, tamannalu kinguneqarnerlussinnaammat. Isumaqanngiinnarpoq kingunera tassaassasoq siulittaasunngortoq tassaasariaqartoq Danmarkimeersoq.

Aamma atuaruk IA-p Dansk Folkeparti kalaallinik ataqqinninnginnerarpaa

Saamerlerneersut sumiginnaasut

Apeqqutaaginnarpoq naalakkersuinikkut suligaanni tupinnartuliaanngitsoq Danmarkimi talerperliit imminnut ajunngitsuliorfigippata. Tamannali Inuit Ataqatigiinneersup akuerinngilaa. Isumaqarpormi iligiit saamerlerneersut ingammillu Socialdemokratit apeqqummi uani sumiginnaasimasut.

- Iligiit saamerlerneersut siulittaasutut atorfik sorsuutiginagu imminiiginnarsimavaat. Taavalu partiimut suleqammut siulittaasup tullinngortitsineq naammagiinarsimallugu, Aaja Chemnitz Larsen oqarpoq.

Aamma atuaruk Kalaallit Nunaannut ataatsimiititaliami siulittaasuuffik talerperliit piumasaraat

Ilanngullugulu oqarluni uggornartuusoq, ataatsimiititaliami Kalaallit Nunaannut pingaaruteqarluinnartumi siulittaasuutitap iligiit allanut tunniunneratigut paasinngikkaat tamanna Kalaallit Nunaanni qanoq paasineqarumaartoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat