Aajap Aleqallu ilinniarnermusiat peqataatinneqarnerlu sulissutiginiarpaat
Tamanna Folketingimi ilaasortap Inuit Ataqatigiinneersup Aaja Chemnitz Larsenip Folketingimi ammaanermi oqallinnermi ullumikkut pisussami pingaarnertut sammisassaasa ilagaat.
- Danskit savalimmiormiullu Folketingimut ilaasortaatitaat naligalugit ataqqineqarnissarput pingaartittupilussuuara, ilaatigut illersornissaq pillugu 2018-imi isumaqatigiinniarnissamut peqataatinneqarnissatsinnut tunngatillugu.
Aamma atuaruk Aaja, Aleqa aamma Kielsen Folketingip ammarneqarnerani
Danskit aningaasaqarnermut ministeriat naapertorlugu, kalaallit savalimmiormiullu folketingimut ilaasortaatitaat aningaasanut inatsisissaq ukiaru isumaqatigiinniutigineqalerpat nutaatut qaaqquneqarumaarput.
Tamannali aamma isumaqatigiinniarnernut allanut Nunatsinnut tunngassuteqartunut atuuttariaqaraluartoq, Aaja Chemnitz Larsen isumaqarpoq.
Danskit politikerii suliniuteqassapput
Danmarkillu Nunatsinni suliassaqarfinni akisussaaffigisamini, ilaatigut eqqartuussiveqarnermi, pitsanngorsaatissatut siunnersuuteqaqqullugit danskit politikerii kaammattorniarpai.
- Ataatsimiititaliat assigiinngitsut pingasut - Kalaallit Nunaannut tunngasunut ataatsimiititaliaq, Eqqartuussiveqarnermut ataatsimiititaliaq aamma Illersornissamut ataatsimiititaliaq - Nunatsinni angalaqqammerput. Angalanerillu taakku suliniutissanik tigussaasunik kinguneqarnissaat naatsorsuutigaara Aaja Chemnitz Larsen suleqatitsinnit Helle Nørrelund Sørensenimit apersorneqarluni taama oqarpoq.
Aleqa Hammondip danskit erfalasuat eqqarsarnartoqartippaa
Attaviitsoq Aleqa Hammond Folketingimi sisamanngorpat oqalugiartussanut aamma ilaavoq. Folketingillu ukiuani takkutilersumi assigiinngitsunik sulissuteqarniarpoq. Ilaatigut danskit SU-inik allannguisoqarnerani kalaallit ilinniartut eqqugaasinnaasut sulissutiginiarpai:
- Danmarkimi ilinniartuutitta taakkua ilinniarnersiuteqartarneranni ajorseriaatigineqarsinnaasut pinngitsoortinnissaat suleqataaffigerusuppara, Aleqa Hammond oqarpoq.
Danmarkillu Issittumut politikkia tassalu nunatsinnut kalaallinullu qanoq sunniuteqarsinnaanera pingaartitamisut aamma eqqaamaa.
- Pingaartitakka suliniarlungalu aamma ingerlaffigisakka allannguuteqanngillat, Aleqa oqarpoq.
Aleqa Hammondip Folketingimit kreditkortini imminut atugassaminik pisiortuutigisimanerata kingorna Simumiit aggustimi ilaajunnaarsinneqarpoq. Maannalu Folketingimi attaviitsutut atuunnini ingerlatilerlugu.
Aamma atuaruk Aaja, Aleqa aamma Kielsen Folketingip ammarneqarnerani
