URANI Aaja: Tamat oqartussaanerannut ajugaaneruvoq
Tamat oqartussaanerat eqqarsaatigalugu ajugaaneruvoq, Kalaallit Nunaanni politikerit Danmarkimi politikerinit siulliullutik inatsit sammissammassuk, Folketingip Kalaallit Nunaat pillugu ataatsimiititaliami ilaasortaq Aaja Chemnitz Larsen oqarpoq.
- Isumaqarpunga tamat oqartussaanerat eqqarsaatigalugu ajugaanerusoq suliat Folketingimi suliarineqartinnagit Kalaallit Nunaanni suliarineqaqqaarnissaat, Aaja Chemnitz Larsen KNR-imut oqarpoq.
Kalaallit Nunaat pillugu ataatsimiititaliami allatsip Jesper Thinghusip uppernarsarpaa, Aaja Chemnitz Larsenip ilaasortaqataatalu Aleqa Hammondip siunnersuutaat malinneqarsimammat, siullermeerneqarnissaa kinguartillugu.
Aamma atuaruk Eqqartuussissuserisut: Urani pillugu inatsisissatut siunnersuutit tunngaviusumik inatsimmut naapertuutinngillat
Folketingimi marlunngorpat oqaluuserineqartussaagaluartoq.
Siullermeerneqarnissaali maanna apriilip 19-iannut kinguartinneqartoq, Jesper Thinghusip uppernarsarpaa.
Taamaalillutik Inatsisartut siunnersuut siulliullutik eqqartortussanngorpaat. Upernaakkut ataatsimiinnermi apriilip 13-ianni pisussanngorlugu, tassa Danmarkimiit sapaatip akunneranik siulliullutik.
- Isumaqarpunga inatsisit Kalaallit Nunaannut tunngasut kalaallit politikeriisa siulliullutik oqallisigisariaqaraat Folketingimi sammineqalersinnagit, Aaja Chemnitz Larsen oqarpoq.
Aamma atuaruk Urani pillugu inatsisissatut siunnersuutit taperserneqarput
Suliffeqarnermut inuussutissarsiornermullu naalakkersuisoq Vittus Qujaukitsoq aamma sakkortuumik isornartorsiorneqarpoq Inatsisartut isumasioqqaarsimannginnamigit.
- Ilisimavarami naalakkersuisuniit naalakkersuisunut attaveqatigiinneq ingerlasartoq. Assorsuarlu uggornarpoq Naalakkersuisut Inatsisartut naalassimanngimmatigit. Parteerami Inuit Ataqatigiit oqaloqatigisimavara ilisimaarillugulu Inatsisartut siulittaasoqarfianni oqallisigineqarsimanngitsoq.
Aamma atuaruk Kirkegaard: Siumup politikkiat ersarippoq
Aaja Chemnitz Larsen oqarpoq Vittus Qujaukitsup parteeqataata Aleqa Hammondip oqarfigisimagaani, eqqunngitsuliornerusoq Kalaallit Nunaanniit siulliulluni Danmarkimi inatsisissatut siunnersuutit suliarineqartarnerat kukkusuusoq.
Isornartorsiut Vittus Qujaukitsumut ingerlateqqipparput. Isornartorsiuinerli oqaaseqarfigerusunngilaa, oqarlunili siunnersuutip siullermeerneqarnissaata ullua Kalaallit Nunaat peqatigalugu nuunneqarsimasoq.
Aamma atuaruk IA: Partii Siumut isummertariaqarpoq
