Taasereersunik paasiniaaneq Aaja Aleqalu siuaqqapput
Illoqarfinni arfiniliusuni KNR-ip qinersisisartut aperai kina taasimaneraat, tassanilu piukkussat siuttuupput.
KNR-ip taasereersunik paasiniaanerata inerneri eqquutissappata Inuit Ataqatigiit Siumullu taaneqarnerpaallutik isertitaqassapput.
Taasereersunik paasiniaanerit Suliplusimiit KNR suleqatigalugu ingerlanneqarput, taakkuli ulloq tamaat illoqarfinnilu arfinilinni taasivinni innuttaasut taasimasaat paasiniarpaat.
IA siuttuuvoq
Aperineqartunilu amerlanerussuteqartut IA-kkunnik taasipput, taakkulu partiit annersaasa aappaanniit Siumumiit amerlanerullutik qinerneqarlutik. Taaseersunik paasiniaarnermit kisitsisit taasisitsinerup inernera tamaakkiisumik takutitsinngikkaluartut, Inuit Ataqatigiit 1638-nik, tassa 48,9 procentinik taaguunneqarsimapput Siumukkullu 1020-nit, 30,4 procentinit taaguunneqarsimallutik.
Qinerneqarnerillu pingajuattut inisssisimasut partiinit marlunnit taariikkatsinnit ikinnerungaatsiarput, tassalu Demokraatit 365-init, 10,9 procentinit qinersereersunit paasiniaavitsinnit taaneqarsimammata. Atassut 208-nit, 6,3-nit taaneqarput, Partii Naleraq 119-init, 3,6 procentinit, taasisunilu 65-it kina imaluunnit partii sorleq qinersimanerlugu allassimanngilaat.
Taasereersunillu paasiniaanerup tassa takutippaa partiit annerit marluk folketingimi qinigaanertik attatiinnassagaat.
Paartiit akornanni unammineq
IA-kkut Siumukkullu iluanni kina isertinneqassanersoq unammissutaassaaq, arnallu marluk siuttuugallarput.
Taasereersut paasiniarneqarmata IA-kkunni Aaja Chemnitz Larsen taassallugu soqutiginerpaavaat. Taassuma 438-t taasisorai, Múte Bourup Egedelu 349-t, Johan Lund Olsen 296-it kingullerlu Karo Fleischer Thomsen 45-nit taaneqarsimalluni.
Siumukkunnilu Naalakkersuisut siulittaasorisimasaat, Aleqa Hammond taaneqarnerpaavoq. Taanna 236-nit taaneqarpoq, Erik Jensen 176-it, Jens-Erik Kirkegaard 130-t , Martha Abelsen 56-it kingullerlu Pitsi Høegh 42-nit taaneqarsimalluni.
Taasereersunik paasiniaaneq Upernavimmi, Ilulissani, Aasianni, Sisimiuni, Nuummi Qaqortumilu ingerlanneqarpoq.
Exitpoll: Taaneqarnerpaat qulit, nal. 20:00