Aaja Aleqalu: Kalaallit Danmarkimiittut tusarusuppagut
Pingasunngorpat Aalborgimi sisamanngorpallu Aarhusimi politikerit taakku marluk ammasimik oqallinnissamut qaaqqusipput, ilaatigut Kalaallit Danmarkimi najjugaqartut qanoq pitsaanerusumik Danmarkimi tikilluaqqusaasinnaanerat akuutinneqarsinnaanerallu eqqartorlugu.
Ataatsimiisitsinerit upernaaru Folketingemi sammineqarnissaanut tusarniaanerussapputtaaq.
Inuit Ataqatigiit Folketingemut ilaasortaatitaata Aaja Chemnitz Larsenip kalaallit Danmarkimut nuuttut piaartumik iliuuseqarfigisarnissaat pisariaqartoq taakkartorpaa.
- Kalaallit Nunaanni inuunermut sanilliutissagaanni Danmarkimi najugaqarneq allaaneroqaaq, inuiaqatigiillu aaqqissuussaanerannut ilisimasaqartuusariaqarpoq nooreersimanermiit piffissap sivisunngitsup iluani ikiorneqarumagaanni inuiaqatigiinnullu akulerullumagaanni, Inuit Ataqatigiinneersoq oqarpoq.
Siumuttaaq Folketingemut ilaasortaatitaata, Aleqa Hammondip, kalaallit Danmarkimut nuukkaangata ajornartorsiutaalersartut aamma sammivai:
- Inuiaqatigiittut annaasaqaatigissavarput inoqaterput ataaserluunniit nakkaatissappat. Inuiaqatigiinni tamattaalluta pinngitsoortinniagassarivarput nunaqqatitta annertuumik ajornartorsiuteqalersarnerat. Inunnik isumaginnittut allallu soqutigisat aallaavigalugit sullissisut ajunngilluinnartumik suliniuteqartaraluartut amerlavallaartutigut pisortat sullissiviiniit kingusinaareerluni aatsaat aalaniartoqartarpoq, Aleqa Hammond oqallittoqannginnerani taama allappoq.
Oqallinneq pingasunngorpat nalunaaqutaq sisamanut Aalborgimi Kalaallit Illuutaanni pissaaq, tullialu sisamanngorpat nalunaaqutaq sisamanut Aarhusimi Kalaallit Illuutaanni ingerlanneqassalluni - kingullerlu Københavnimi Kalaallit Illuutaanni - ataasinngorpat februaarip 22-ani nalunaaqutaq tallimanut ingerlanneqassalluni.