AA-mi ilaasortat ataatsimiiffisaaleqinerat oqallisigissavaat
AA-mi ilaasortat inimik ataatsimiiffissaqannginnertik naammagiunnaarpaat, tassami ataatsimiittarfissamik nassaarniarnissamik borgmesterip marsimili neriorsoraluarmatik. Simon Simonsenip, kommunimi Inunnik isumaginninnermut ataatsimiititaliap siulittaasua, ullumi ataatsimeeqatigissavaa.
AA-mi ilaasortat ilaata, Kristian Isbosethsenip, inimik ataatsimiittarfeqalernissaq pingaaruteqarnerarpaa. Ataatsimiittarfissamik suli nassaarsimannginneq borgmesterip ima nassuiaatissaqartippaa:
- Kommunimi inunnik isumaginninnermut pisortaq, tamakkuninnga nalinginnaasumik isumaginnittartoq, peqanngingaatsiarsimavoq, kingornalu aamma napparsimalluni. Simon Simonsen aamma oqarpoq, AA-mut ilaasortat ininik ataatsimiittarfiugallarsinnaasunik neqeroorfigineqarsimagaluartut, qujaannarsimasulli.
Oqaluffimmi ataatsimiissinnaanerat ilaatigut aamma neqeroorutigineqarsimagaluarpoq.
AA-mut ilaasortat kissaataat pimoorullugu borgmesteri erseqqissaavoq. Taamaammat peqatigiiffiup Inunnillu isumaginninnermut ataatsimiititaliap ataatsimiinnissaat ullumi anguniarniarpaa, periarfissat kissaatillu oqaluuserineqarniassammata.