Eqqarsartaatsimikkut Dronning Ingridip napparsimasunut immikkoortortaami A1-mi sulisussaaleqineq qaangeriartorneqarpoq.
Taama oqaluttuarpoq Peqqissutsimut Pisortaqarfimmi immikkoortortami pisortaq, Marianne Arnfjord.
-A1-mi pissutsit ilorraap tungaanut ingerlapput,
sulisut pisortallu akornanni tatigeqatigiinneq annerulermat sulineq oqinnerulerpoq, Marianne Arnfjord allappoq.
A1-mi sulisut namminneerlutik sulinerminni atukkatik pillugit misissuinermik aallartitsipput, misissuinerlu tamanna napparsimmavissuarmi immikkoortortani sulisut namminneerlutik misissuinerissavaat.
A1 piffissami qaangiuttumi annertuumik sammineqarpoq, sulisoqarnikkut annertuumik amigaateqarfiunini, sulisussanillu nutaanik pissarsiniarnikkut ajornartorsiuteqarnini, pissutigalugu.
A1-mi peqqissaasutut atorfiit tamarmiusut maannakkut inuttaqalerput, tassa atorfeqavissut marluk saniatigut taartaagallartut arfinillit sulisorineqalermata.
A1-mi peqqissaasut pisortaattut atorfik taamaattoq suli inuttaqanngilaq, atorfimmulli soqutiginnittumik maanna attaveqarlutik Peqqissutsimut Pisortaqarfimmiut nalunaarput.