9 meterinik portussuseqartumik tassaarsuaqarnissaa aarlerinaraluartoq inuit Illorsuarnut angerlarusuttut
Karrat Kangerluanni tassaarsuaqarnissaa suli aarlerinarpoq. Tamanna naatsorsuinerit kingulliit takutippaat.
* Karrat Kangerluanni qaqqaq ulorianartorsiortitsisoq ataatsikkut nakkaakkaluaruni tamanna tassaarsuaqartitsisinnaavoq.
* Nakkaasoqaraluarpat 5 meterit tikillugit portussuseqartumik nunatta avannaani Niaqornani, Qaarsunni Uummannamilu tassaarsuaqarsinnaavoq.
* Qaqqap ataatsikkut sisooratarnissaa ilimanavinngilaq. Taamaattoqannginnissaali qulakkiivinneqarsinnaanngilaq.
Paasissutissarsiffik: Ilisimatusarnermut avatangiisinullu naalakkersuisoqarfik
Tamannali nunaqarfimmut – Illorsuarnut angerlarusukkunnaartitsinngilaq.
Tamanna Peqatigiiffik Illorsuit siulittaasuata, Dorthe Qvistip oqaatigaa.
- Angerlarusuttuaanaavippugut ukiut sisamat tungaanut ingerlareeraluartut suli kajusivugut angerlarusulluta.
Qaqqamit sisoortoqarneratigut tassaarsuaqarnerata kingunerisaanik Illorsuit 2017-imi inuerutitinneqarpoq. Tassaarsuaqarnera Nuugaatsiami inuit sisamat inuunerannik naleqarpoq. Illorsuit taama eqqugaatiginngilaq.
AAMMA ATUARUK Tassaarsuaqarsinnaanernut naliliineq nutaaq: Karrat Kangerluanni tassaarsuaqaratarsinnaasoq
Nunaqarfiit tassaarsuaqarnerata kingornali najugaqarfiunngillat, Illorsuarneersulli eqimattat angerlarnissaminnik kissaateqarluinnartut peqatigiiffimmik pilersitsipput, angerlarnissaminnillu sulissuteqarlutik.
Peqatigiiffillu naapertorlugu tassaarsuaqarsinnaaneranulluunniit naliliinerup nutaap kissaat tamanna unitsissinnaanngilaa.
Mallit 9 meterinik portussuseqartut Illorsuarnut anngussinnaasut
Illorsuit Nuugaatsiallu eqqorneqarsinnaaneranik naliliinerup saniatigut Niaqornat, Qaarsut Uummannarlu Karrat Kangerluanni qaqqamit nakkaasoqaqqissagaluarpat tassaarsuarmit aamma anguneqarsinnaapput.
Ajornerpaamik pisoqassagaluaruni tassaarsuaq uku missaannik portussuseqassasoq:
- Nuugaatsiami 28,4 meterit,
- Illorsuarni 8,7 meterit,
- Niaqornani 3,8 meterit,
- Qaarsuni 4,8 meterit, aamma
- Uummannami 4 meterit.
Tigusiffik: Naalakkersuisut
Illorsuarni ajornerpaappat mallit 9 meterinik portussuseqartut nunaqarfiup sissaanut qaarsinnaapput, taamaattoqassappallu illut amerlanersaat anguneqassallutik.
Niaqornani Qaarsunnilu upalungaarsimaneq annertusineqarpoq, taakkunanilu tassaarsuaqarnissaanut nakkutilliisunik imaanik nakkutiginnittussanik ilaatigut atulersitsisoqarluni.
Illorsuarni aamma taamaaliortoqarsinnaasoq, Dorthe Qvist siunnersuuteqarpoq.
- Taava sooq Illorsuarni kalerrisaarutinik pilersitsisoqanngila, uteqqikkuttalu nakkutilliisunik sulilersitsisoqarluni? Illullu aarlerinartumiittut qullerneqarsinnaapput, taanna oqarpoq.
AAMMA ATUARUK Borgmesteri tassaarsuaqarsinnaaneranik nalileereernermi: Pikkoriffiginerusariaqarpasipparput
Paasissutissalli kingulliit qularnartut Ilisimatusarnermut Avatangiisinullu Naalakkersuisoqarfiup siusinnerusukkut paasissutissiissutigaa. Sumiiffimmili suli aarlerinartoqarnera pissutigalugu saqqummiunneqarput.
Naatsorsuinerit suli immikkuualuttoqarnerusut upernaap ingerlanerani piareernissaat naalakkersuisoqarfiup naatsorsuutigaa. Naatsorsuinerillu taakku Dorthe Qvistip qilanaarai.
- Uternissamut neriuuteqarpugut, tassunga sakkussamik nutaamik aallertoqarsinnaajumaasasoq. Taavalu isumannaallisaaneq eqqarsaatigalugu aaqqissuusisoqarluni.