7.b-mi atuartut pujortartalerniannginnamik ajugaapput
Nuummi Kangillinnguit atuarfiani 7.b-mi atuartut Paarisap atuartunut akullernut unammisitsineranni ”Atuaqatigiit pujortartanngitsut-2005-” ajugaanertik paasillugu nuannaaqaat.
Kangillinnguit atuarfiani 7b. mi atuartut Paarisap akullerni atuartunut pujortartarnerup peqqinnanngissusianik paasitsitiniaajutigaluni unammisitsinerani sineriammi atuaqatigiiaat 30-it peqataaffigisaanni akornanni ajugaagamik 20.000 koruuninnapput.
Sikkerninnguaq Lindenhann aamma Ania Olsvig tamarmik 12-inik ukioqartut unammisitsinermi ajugaanertik ima oqaluttuaraat:
- Ilinniartitsisorput iserluni oqarmat ajugaasimasugut nuannaarnermit torsuuusami pississaarpugut, Sikkerninnguaq oqarpoq.
Ania Olsvig oqaluttuarpoq peqataanissaminnut ilaatigut isiginnaagassiorsimallutik tunniagassaminnillu tajaliortitersimallutik.
Atuartut unammisitsinermi peqataanerminni assigiinngitsorpassuarnik ilinniartitsisortik Cecilie Vahl angajoqqaatillu peqatigalugit piareersaateqartarsimapput.
Atuaqatigiit pujortartarneq pillugu meeraqatiminnut inersimasunullu aamma isiginnaagassiorsimapput, ” Pujortarnata –Torrak” - mik allannilinnik kiisalu Nuummi utoqqarnik, innarluutilinnik meeqqanillu peqatiserinnillutik pujortalinnginnissamut kajumissaarutinik allagartarsualisarlutik pisuttuartitsinermik aaqqissuussisimallutik.
Atuaqatigiit ilinniartitsisuat Cecilie Vahl ” 7.b-mi atuartut ”Atuaqatigiit Pujortartanngitsut-2005”-imut peqataanissaanut tunngaviusut ima nassuiaatigai:
-Tamatta ilisimavarput pujortartarneq qanoq navianaateqartigalunilu akisutigisoq, taamaattumik unammisitsisoqarnialermat atuartut peqataanissaat angajoqqaat isumasioriarlugit siunniussimavarput.
Cecilie Vahl aamma isumaqarpoq meeqqat namminneq qaammarsaanermut peqataatinneqarnertik pissarsiffigilluaraat.
Atuaqatigiit aningaaasat nunamut allamut angalanermut atorniarpaat.
Atuaqatigiit pujortarnerup navianassusianik paasisassarsiortarnerminni paasigamikku ulloq maajip sisamaat nunarsuaq tamakkerlugu pujortanngiffiusoq, Nuup borgmesteriannut saaffiginnissimapput Nuummi atuutinneqalernissaanut siunnersuuteqarlutik. Nuup borgmesteria Agnethe Davidsen neriorsuuteqarsimavoq siunnersuut ukiumi nutaami kommunalbestyrelsip ataatsimiinnerani oqaluuserineqassasoq.