Assi: Malik Brøns / KNR

788-it nutaat sisamanngornermi tunillatsittut

Ilulissani inuppassuit tunillatsissimapput, aamma utoqqaat illuanni tuniluuttoqarpoq.

Nunarput tamakkerlugu coronavirusimik tunillatsissimasut 788-it sisamanngornermi paasineqarpoq.

Naalakkersuisut misissortittarnermut tunngatillugu allannguuteqartoqarnerata kingorna misissortittartut siornatigornit ikileriarput.

Taamaammallu 788-init amerlanerusut coronarsimanissaat, Nunatta nakorsaaneqarfiata ilimagaa.

Ilulissani misissortittut 68 procentii coronavirusimik tunillanneqarsimapput.

Tassalu Ilulissani coronavirus maannakkut tuniluutingaatsiarpoq, massakkullu utoqqaat illuanni aamma tuniluuttoqarluni. Utoqqaat illuani inuit 16-it coronartut paasineqarput. Utoqqaat illuanni najugallit tamarmiki pingajussaanik akiuussuserneqarnikuupput.

- Akiuussutissap iluaqutaalluarnissaa neriuutigaarput, tamarmik coronamik atuipilunnatik qaangiinissaat neriuutigaarput. Utoqqaat illuat sapaatini akunnernik pingasunik matoqqassasoq, Avannaata Kommuniata facebookimut quppernerminut allappoq.

Qeqertarsuarmi innuttaasut coronavirusimik suli eqqugaanngillat. Tamaani inuit 67-it misissortikkamik tamarmik coronanngitsut, nunatta nakorsaaneqarfiat ilisimatitsivoq.

Illoqarfiup pingaarnersaani misissortittut affai tunillatsissimasarput

Nuummi inuit 944-t misissortinneranni 437-t tunillanneqarsimasut paasineqarpoq. Tassalu misissortittut affangajassui positiviupput.

Tasiilami inuit 33-t misissortinnerata inernerata tunillatsittoqarsimanngitsoq takutippaa.

Aasianni Sisimiunilu pissutsit allaapput. Tamaani misissortittut 24 procentii aamma 32 procentii tunnillanneqarsimapput. Nunatta nakorsaanerata naliliinera naapertorlugu illoqarfinni taakkunani tuniluunneq annertusiartoqarpoq.

Maniiitsumi aamma tuniluuttoqarpoq. Maniitsumi 268-it misissortinneranni taakkuannga 58-it coronartut paasineqrpoq.

Kujataani suli tuniluunneq annertusinngilaq

Kujataani tuniluuttoqalaarpoq kisianni annertunngitsumik. Qaqortumi inuit 343-t misissortinneranni 61-it tunillanneqarsimassut paasineqarpoq, Narsami 187-ini misissortittut 64-it coronarput, ataaserlu covid-19-imik napparsimanini peqqutigalugu napparsimmavimmi uninngalluni.

Nanortalimmi Inuit 70-it misissortinneranni ataaaseq tunillanneqarsimasoq paasineqarpoq.

Nuummi Ilulissanilu tuniluunneq sapaatini akunnerni aggersuni annerpaamiilissasoq nakorsaaneqarfiup nalilerpaa. Illoqarfinnimi taakkunani tuniluunneq ingerlaartoq annertusingaatsiassasoq nakorsaaneqarfik ilimasaarivoq.

Qaanaami, Upernavimmi Uumannamilu misissuutinik tigusaqartoqanngilaq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl